Notícies Veir istoric
Eth servici d’aigües municipaus de Vielha e Mijaran acumule un deficit de lèu 500.000€ en 2023
Era màger part d’aguesta quantitat proven dera despena en mantenement des depòsits e canerades, inversions, es reparacions e subministrament der aigua enes desparièrs pòbles
Eth servici d’aigües municipaus de Vielha e Mijaran viu ua situacion economica complicada. En 2023 s’a acumulat un deficit de 480.809,28€. Ua quantitat tanplan anauta entà un municipi damb pòc mès de 5000 abitants, a on er ingrès per impòst de mantenement deth hilat d’aigües ei de 240.000€.
Era màger part d’aguest deficit (320.451€), proven dera despena de personau, eth mantenement des depòsits e canerades, es reparacions realizades e eth subministrament der aigua enes desparièrs pòbles.
Se tracte d’un des servicis basics que balhe er Ajuntament de Vielha e Mijaran, en tot auer invertit ua grana quantitat de sòs publics pendent es darrèri ans. Sonque en 2023 s’a invertit 91.563€ en apariar eth depòsit de Vila, tanben 58.830€ en reformar eth hilat d’aigües deth carrèr Còsta de Vilac. Atau madeish, se trabalhe ena milhora dera canerada dera Carretèra de Gausac, en tot cambiar-la de fibrociment per polietilen, avalorat en 37.418€. E, ei en licitacion, eth cambi des canerades dera Avenguda Calbetó Barra de Vielha, damb un pressupòst de 212.545€.
Enes ans anteriors, des der Ajuntament de Vielha e Mijaran s’an realizat desparières intervencions en tot eth municipi entà milhorar eth servici d’aigües municipaus. En aguest sens, i a agut projèctes coma era substitucion des canerades en Vielha des carrèrs: Avenguda Pas d’Arró, Carrèr Montcorbison, Carrèr Major (e carrèrs transversaus) o Carretèra de Gausac, entre d’auti, damb ua inversion totau superiora as 500.000€. Atau madeish, s’an realizat trabalhs de manteniment de toti es depòsits municipaus pr’amor que hège fòrça ans que non auien recebut cap tipe de tractament entà controtlar eth sòn corrècte foncionament, e s’an començat a apariar bona part d’eri (Vila, Vielha, Betren, Arròs e Vilac entre d’auti).
En çò que tanh ara substitucion deth fibrociment des canerades, actuaument des der Ajuntament de Vielha e Mijaran ja s’a remplaçat eth 60% deth hilat municipau per polietilen. Ua mesura tanplan de besonh, pr’amor qu’eth fibrociment ei nociu entara salut, demore obsolet e per mandat dera Union Europèa a d’èster eliminat abans de 2018. En aguest sens, des deth consistòri se trabalhe ena redaccion deth projècte d’eliminacion de tot er amiant entà cumplir, precisament, damb aguest objectiu establit per Euròpa.
“Entar equip de govèrn der Ajuntament de Vielha e Mijaran, eth servici des aigües municipaus ei un des ahèrs fonamentaus en quau trabalham des de hè diuèrses legislatures ençà. Auem apariat bona part des depòsits e des canerades, mès eth servici ei deficitari e calerà cercar naues formules d’inversion entà poder contunhar trabalhant ena melhora d’aguest servici basic”, comente eth baile der Ajuntament de Vielha e Mijaran, Juan Antonio Serrano.