Notícies Veir istoric
Vielha e Mijaran finalize un gran ostiu damb ua cinquantia d’eveniments autant culturaus coma esportius
Eth municipi a tornat a èster un referent en Pirenèu damb ua nauta preséncia toristica, ena que pendent tres mesi i a agut activitats de tot tipe, e entà toti es publics
Vielha e Mijaran a finalizat era sason d’ostiu damb un ample conjunt d’activitats a nivèu culturau e esportiu, en tot auer acuelhut ua cinquantia d’eveniments.
En airau esportiu, Vielha e Mijaran a tornat a plaçar-se coma epicentre deth Pirenèu damb fòrça activitat pendent tot er ostiu. En aguest sens, destaque era celebracion de pròves fòrça importantes coma era 3au edicion dera competicion d’ultra-trail Aran by UTMB, qu’acuelhec a lèu 4000 persones en junhsèga, era 6au Trail Vielha-Molières 3010 damb mès de 500 participaires, o era 17au Pedals de Foc Non Stop de BTT qu’en junh amassèc a 1000 participaires. Atau madeish, Vielha tanben a apostat peth mototorisme, damb grani eveniments coma siguec era 12au Rodibook, damb 1200 participaires. E es installacions esportiues municipaus tanben an compdat damb ua nauta preséncia d’usatgèrs, a on cau remercar qu’eth Palai de Gèu seguís en tot atreir a fòrça gent, coma a estat eth cas des stages d’ostiu de patinatge artistic e de tecnificacion damb entrenadors internacionaus.
Era preséncia de toti aguesti eveniments esportius generèc ua repercusion economica de mès de 2 milions d’èuros en benefici deth sector toristic de Vielha e Mijaran, en tot èster un des milhors ostius autant de Vielha coma deth conjunt dera Val d’Aran des darrèri 30 ans.
En airau culturau, i a agut teatre en carrèr, jòcs de husta, e era hèira deth playmobil, damb activitats entara mainadèra pendent diuèrses dimenjades de junhsèga e agost. D’aute biais, es còlhes de dances araneses tanben an amenizat es vrespades damb diuèrses actuacions e auem compdat damb es membres de Balharan e d’auti mèstres arribadi de dehòra entà aprigondir en mon dera salsa cubana e era bachata. E, fin finau, tanben s’a podut gaudir de hèires e mercats artesanaus, atau coma es diuèrses hèstes majors des pòbles deth municipi, cargades d’activitats entà toti es publics.
“Èm fòrça satisfèti per auer barrat un ostiu damb tanti eveniments esportius e culturaus qu’an generat qu’age estat ua grana sason, coma ja ei abituau pendent hè fòrça ans”, comente eth baile de Vielha e Mijaran, Juan Antonio Serrano. E ahig que “auem compdat autant damb activitats en carrèr coma enes installacions municipaus, e seguiram damb aguesta linha de trabalh pendent era tardor e er iuèrn, damb fòrça mès activitats entà tota era familha. Èm un referent en Pirenèu, e atau volem contunhar”.
13/09/2023