Notícies Veir istoric
Eth plen der Ajuntament de Vielha e Mijaran apròve era modificacion des ordenances fiscaus, taxes e prètzi publics entar an 2024
Damb era requectacion serà possible que i age un seguit d’inversions que siguen possibles entà milhorar es servicis basics qu’er Ajuntament de Vielha e Mijaran prèste ara ciutadania
En plen ordinari der Ajuntament de Vielha e Mijaran celebrat aguest maitin s’a aprovat era modificacion des ordenances fiscaus, taxes e prètzi publics entar exercici 2024.
Aguesta mesura a coma objectiu implementar ua milhora des servicis qu’actuaument prèste er Ajuntament de Vielha e Mijaran vèrs era ciutadania, atau coma fomentar ua modernizacion qu’ei de besonh dera administracion.
Era modificacion a estat aprovada damb es vòts a favor des membres deth govèrn municipau d’Unitat d’Aran e eth vòt en contra dera oposicion de Convergéncia Aranesa e Aran-Amassa.
Es impòsti que se modificaràn, ac haràn en consonància damb era evolucion der IPC des darrèri 4 ans. Er Impòst sus Bens Immòbles (IBI) passarà de 0,59 a 0,67 en bens immòbles urbans, en tot demorar Vielha coma un des cap-lòcs des comarques de Lhèida damb eth tipe mès baish, e eth mès baish en relacion ara rèsta de municipis dera Val d’Aran. Mentre que i aurà ua pujada de 0,60 a 0,69 en bens immòbles rustics e, un aument de 1,30 a 1,49 en bens immòbles de caracteristiques especiaus. I aurà ua bonificacion deth 30% a favor des construccions, installacions e òbres enes que s’incorpòren sistèmes de profitament termic o electric d’energia solara.
En çò que tanh ar Impòst sus Veïculs de Traccion Mecanica, i aurà ua actualizacion entà tota classa de veïculs, en tot aument der 1,40 actuau a 1,85.
Damb er impòst sus es construccions, installacions e òbres (ICIO), se produsirà un aument deth 2,40 actuau ath, 3,75. En tot cas, s’establís ua bonificacion deth 75% a favor des construccions, installacions e òbres de viuendes de proteccion oficiau en nuclèu urban, atau coma deth 25% en bastisses plurifamilhars, viuendes unifamilhares e locaus publics que se reformen, en tot adaptar-les ara normatiua d’accessibilitat de persones damb mobilitat redusida.
Er aute impòst que se modificarà serà eth des activitats economiques (IAE). En aguest cas, se modificarà eth coeficient de situacion e se modificarà era classificacion pes categories de situacion establides.
D’aute biais, s’introdusirà ua naua taxa pera prestacion de servicis d’aigües lordes e depuracion des aigües, ua auta pera prestacion des servicis tecnics e ua tresau pera aucupacion dera via publica pera installacion de pannèus, toldos e elements auxiliars. Aguesta darrèra s’amiarà a tèrme en tot elaborar ua naua ordenança fiscau.
Damb era requectacion serà possible que i age un seguit d’inversions que siguen possibles entà milhorar es servicis basics qu’er Ajuntament de Vielha e Mijaran prèste ara ciutadania. Atau madeish, se poderà acabar de substituir eth fibrociment des canerades qu’encara manquen per cambiar per polietilen, e qu’a d’èster prèst en 2028. Actuaument, manque eth 30% deth hilat de fibrociment per eliminar. E, fin finau, serà possible poder aumentar era aportacion qu’eth consistòri destine as Entitats Municipaus Descentralizades entà que poguen aufrir ua milhor gestion des servicis basics enes pòbles.
“Es taxes e prètzi publics non an patit cap aument en 8 ans, de manèra qu’era qualitat des servicis que prèste er Ajuntament de Vielha e Mijaran se resentís e açò mos ac cau evitar. Per aquerò ei de besonh adaptar-les as còsti reaus, en tot patir ua actualizacion generau deth 14,9%”, comente eth baile der Ajuntament de Vielha e Mijaran, Juan Antonio Serrano. E ahig que “ei de besonh aguest aument des impòsti e taxes entà poder amiar a tèrme inversions en projèctes de milhora e manteniment de diuèrsi servicis, coma ei, per exemple, eth des aigües lordes e aumentar era dotacion economica as EMDs”.
27/09/2023