Notícies Veir istoric
Er Ajuntament de Vielha e Mijaran repren es amassades periodiques damb es Entitats Municipaus Descentralizades entà méter en comun es sòns interèssi
Un des punts principaus que s’a tractat ena darrèra amassada a estat era confirmacion der aument dera aportacion economica per part deth consistòri damb es EMD en pressupòst municipau de 2024
Aguesta setmana, er Ajuntament de Vielha e Mijaran a reprenut es amassades periodiques que manten damb es Entitats Municipaus Descentralizades damb es que se preten mantier ua relacion estreta entre es administracions, en tot méter en comun quini son es interèssi e besonhs qu’a cada pòble, damb era volontat de que i age ua collaboracion dirècta damb eth consistòri.
En aguesta naua amassada celebrada aguesta setmana s’a tractat er aument dera aportacion economica qu’er Ajuntament de Vielha e Mijaran destinarà as Entitats Municipaus Descentralizades en pressupòst municipau de 2024, en quau trabalhe er Equip de Govèrn municipau entà èster aprovat abans d’acabar aguest an. En aguest pressupòst s’establirà quina quantitat aurà de percéber cada EMD, en tot seguir eth principi d’equitat e que totes agen es madeishes oportunitats. D’aguesta manèra, es que mès sòs an de besonh receberàn mès en foncion dera situacion que viu cadua e es besonhs qu’an, sense auer en compde sonque critèris demografics.
Damb aguesta mesura, se preten balhar mès autosufisença as pòbles, e qu’agen mès competéncies e siguen mès resolutius entà poder solventar, damb era màger eficiéncia, era gestion des servicis basics qu’amien a tèrme en relacion ara sua ciutadania. Açò ei qu’agen mès capacitat de decision en cada airau competenciau.
Ena anteriora amassada, celebrada en junhsèga, ja s’acordèc qu’es EMD agen era competéncia vèrs ara jardineria e neteja pendent er ostiu, de manèra que poguen auer partides pròpries e que poguen realizar contractacions de personau temporau en ostiu.
Er objectiu d’aguestes amassades ei mantier era estreta relacion entre er Ajuntament de Vielha e Mijaran e es EMD, en tot trabalhar entà poder conéisher quini son es besonhs des diuèrsi pòbles, establir ua connexion entre es naui membres des diuèrses institucions e començar a elaborar ua huelha de rota de trabalh a seguir.
“Er equip de govèrn de Vielha e Mijaran manten era voluntat de trabalhar conjuntament damb es EMD, coma a estat abituau enquiara, e preten balhar-les supòrt e mès autonomia entà que poguen auer libertat entà decidir coma gestionar es sòns pròpris servicis e recorsi”, comente eth baile der Ajuntament de Vielha e Mijaran, Juan Antonio Serrano. E ahig que “precisament,damb aguest aument dera aportacion economica en pressupòst de 2024, confirmam eth compromís der Ajuntament entà mantier ua collaboracion estreta damb es nòsti pòbles, ath viatge que les balham mès autonomia e capacitat de decision”.