Notícies Veir istoric
Era Bibliotèca Generau de Vielha celèbre eth sòn 22au aniversari
Es dies 21 e 24 de noveme i aurà desparières activitats culturaus en aguest equipament: iòguicondes, condes entara mainadèra e entàs repopets e eth liurament des prèmis de fotografia e de microrelats
Era Bibliotèca Generau de Vielha a hèt public eth pannèu damb es actes de celebracion deth sòn 22au aniversari organizadi per airau de cultura der Ajuntament de Vielha e Mijaran. Enguan, aguesta hita aurà lòc pendent era setmana deth 20 ath 24 de noveme.
Er aniversari se comencèc hè ues setmanes damb un parelh de concorsi. Per un costat, era 8au edicion deth Concors de Microrelats a trauès deth hilat sociau Twitter. Entà participar calie que cada usatgèr d’aguesta plataforma seguisse eth compde dera Bibliotèca, e que ’piulesse’ un relat de 280 caràcters. Enguan, era tematica escuelhuda entath concors siguec “Entre Montanhes”, en tot èster un microrelat de creacion pròpria e que non age estat premiat en d’auti concorsi.
Ath delà, tanben se celebrèc eth 7au Concors de fotografia “Eth mèn repopet”, qu’amie a tèrme era Bibliotèca, amassa damb er Ajuntament e er airau de Pediatria der Espitau Val d’Aran. Aguest concors preten mostrar era vida vidanta des repopets: ath torn deth leitatge maternau, es jòcs, es minjars, eth dromir…
En çò que tanh as activitats pròpries d’aguesta setmana, eth calendari ei eth següent:
- Dimars 21 de Noveme: Entàs 17:30, Iòga en Familha, damb Silvana Penino.
- Diuendres 24 de Noveme: Entàs 10:00, session de condes entar alumnat dera Escòla Garona damb “Contes que fan bullir el calder de la Iaia Maria”. Entàs 17:00, condes entàs repopets (0 a 2 ans), damb “La Medusa Perduda“ damb Eva González. E ara seguida, liurament de prèmis de fotografia e de microrelats.
20/11/2023