Notícies Veir istoric
Er Ajuntament de Vielha e Mijaran collabòre damb er Institut d’Aran entà méter en foncionament eth programa de servici comunitari
Damb aguesta accion, 90 alumnes de 3au cors dera ESO realizaràn desparières trabalhs en desparièrs servicis e activitats publiques
Eth 2au tinent d’alcalde e còsso d’educacion der Ajuntament de Vielha e Mijaran, Alberto López, s’a amassat damb era cap d’estudis der Institut d’Aran, Pilar Lladonosa, entà méter en foncionament a compdar deth mes d’hereuèr eth programa de servici comunitari damb er alumnat deth centre.
Concretament, un totau de 90 alumnes de 3au cors dera ESO desvoloparàn trabalhs de servici comunitari a trauès de desparièrs servicis e activitats publiques. En totau, seràn 10 ores cadun entre es mesi d’hereuèr e junh.
Er objectiu d’aguest projècte de servici comunitari ei milhorar es besonhs der entorn e participar actiuament ena vida sociau.
“Des der Ajuntament de Vielha e Mijaran credem qu’ei fòrça positiu entar alumnat de 3au dera ESO der Institut d’Aran poder realizar activitats de servici comunitari, pr’amor que lis servirà entà madurar e formar-les de cara ara sua vida adulta, en tot ajudar-les a conéisher milhor coma foncione era vida vidanta dehòra der airau escolar”, comente eth 2au tinent d’alcalde e còsso d’educacion der Ajuntament de Vielha e Mijaran, Alberto López. E ahig que “damb aguest projècte seguim en tot mantier era collaboracion deth consistòri damb er Institut d’Aran, que ja auem des de hè fòrça ans, en tot ajudar ena formacion des alumnes de cara ath sòn futur ena vida adulta”.
16/01/2024