Notícies Veir istoric
Er Ajuntament de Vielha e Mijaran e era Unió de Federacions Esportives de Catalunya trabalharàn amassa ena gestion deth Palai de Gèu
Era UFEC assesorarà en prètzhèts sus era gestion dera installacion, en tot trabalhar damb er objectiu d’elaborar un plan estrategic de viabilitat
Er Ajuntament de Vielha e Mijaran e era Unió de Federacions Esportives de Catalunya (UFEC) an barrat un acòrd entà trabalhar amassa ena gestion deth Palai de Gèu.
D’aguesta manèra, era UFEC aportarà toti es coneishements de besonh qu’an en matéria de gestion esportiua entà balhar supòrt ath consistòri ena gestion dera installacion esportiua municipau.
Concretament, era UFEC apòrte era figura d’un assessor fixe en Palai de Gèu entà ajudar ara direccion der equipament en materia d’inversions, manteniment, gestion esportiua e comerciau que siguen de besonh amiar a tèrme.
Er objectiu ei que se pogue elaborar un plan estrategic de viabilitat que pogue establir ua huelha de rota a seguir, en tot assolidar eth futur deth Palai de Gèu. Era UFEC compde damb fòrça experiéncia en çò que tanh ara gestion esportiua, e collabòren damb equips d’enginhèrs e d’aute personau tecnic.
“Credem qu’eth supòrt que mos balharà era UFEC damb eth personau assessor fixe e d’auti tecnics en Palai de Gèu serà un element fonamentau entà ajudar a establir un plan estrategic de viabilitat qu’assegure eth futur dera installacion municipau”, comente eth baile der Ajuntament de Vielha e Mijaran, Juan Antonio Serrano. E ahig que “era UFEC compde damb experiéncia ena gestion esportiua e entre toti desvoloparam tota sòrta d’accions que siguen de besonh entà qu’es nòsti usatgèrs agen es milhors condicions e activitats possibles, qu’ei çò que merite Vielha e Mijaran, en tot tier en compde qu’eth Palai de Gèu ei era principau installacion esportiua deth municipi e que balhe servici a tota era Val d’Aran”.
17/01/2024