Notícies Veir istoric
Er Ajuntament de Vielha e Mijaran reformarà es accèssi ath Palai d’Espòrts, ar Skate Park e ara pista de fronton
En Palai d’Espòrts se substituirà er accès de husta per un solèr de panòt, mentre qu’en accès ar Skate Park e ara pista de fronton se bastirà un paviment d’hormigon, ath delà de netejar e adaptar era zòna e milhorar-ne era seguretat
Er Ajuntament de Vielha e Mijaran a adjudicat es òbres de reforma e apariament des accèssi as installacions esportiues deth Palai d’Espòrts, er Skate Park e era pista de fronton.
Aguesti trabalhs, que s’iniciaràn enes pròplèu setmanes, s’an adjudicat per valor de 31.344,89€.
En Palai d’Espòrts, se substituirà er actuau solèr de husta que se trape en un estat tanplan deficient per un nau solèr a base de panòt, fòrça mès segur e eficient. En accès ar Skate Park e ara pista de fronton, se bastirà un paviment d’hormigon des deth laterau deth Palai d’Espòrts. Ath delà de netejar e rebaishar er airau que s’aurà de pavimentar, en tot milhorar autant er accès coma era seguretat dera zòna.
D’aute biais, i aurà ua milhora der entorn des equipaments. Se substituirà era actuau hònt d’aigua e s’i plaçarà ua de naua. E s’adaptarà era zòna d’installacions exteriores. S’eliminarà er actuau mur e er andàs metallic actuau, en tot bastir un nau mur acompanhat, tanben, d’un andàs d’acièr nau.
“Aguesti trabalhs de milhora en accès as installacions esportiues municipaus son fòrça de besonh, pr’amor que se trapen en un estat tanplan maumerenc. Des der equip de govèrn volem refortilhar era seguretat des usatgèrs qu’empleguen aguesti equipaments, pr’amor qu’ei un endret de Vielha a on i transite fòrça gent, autant mainadèra coma adults, e deisharam aguest parçan enes condicions que meriten”, comente eth baile de Vielha e Mijaran, Juan Antonio Serrano.
26/01/2024