Notícies Veir istoric
Eth milhor cinèma de montanha deth mon torne tà Vielha es dies 15 e 16 de març damb eth 6au Mendi Tour
Eth cap-lòc aranés organize aguest eveniment a on se projectaràn ueit des milhors films de cinèma de montanha dera darrèra edicion deth BBK Mendi Film Bilbao-Bizkaia
Es pròplèu 15 e 16 de març, Vielha tornarà a celebrar ua naua edicion deth hestau de cinèma de montanha Mendi Tour Vielha.
Pendent aguesta 6au edicion d’aguestes jornades, se projectaràn un totau de 8 pellicules. Diuendres 15 de març, a compdar des 19:00, se començarà damb “Zerbait aldatu da” (Seccion Oficiau Mendi Festival 2023), dirigida per Mikel Sarasola. Petiti arrius de gran desnivèu que totes es primaueres s’aumplissen d’aigua deth desgèu, hèn deth Pirenèu un paradís entara practica deth kayak extrèm. E d’entre toti es arrius dera sarrada, ena sua vessant sud, destaque un sus toti es auti: Er arriu Ara, coneishut pes sues aigües clares, e es sues longues e espectaculares arribentes, ei era jòia dera corona. Jan Larrue e Mikel Sarasola se junhen entà sajar de descéner aguest arriu des dera sua neishença. Eth 2au film se titole “Rope” (Milhora Pellicula d’Aupinisme/Milhora Banda Sonora Mendi Festival 2023), dirigit per Moe Wada, a on Kazuya Hiraide, eth tres còps guanhador deth Piolet d’Aur ath conquistar es rotes jamès escalades de Kamet, Shispare e Rakaposhi, descorbic ua rota ideau ena cara nòrd de Tirich Mir (7708 m, Hindu Kush, Paquistan) hè 20 ans. A fins deth 2022, Hiraide convidèc a Kenro Nakajima a escalar-la amassa. Nakajima a estat eth sòn companh d’escalada des de 2016. Es dus aupinistes abandonen eth campament base entà escalar eth Tirich Mir sense oxigèn artificiau ne grani supòrts. Era 3au projeccion ei “Captains on El Cap” (Seccion Oficiau Mendi Festival 2023), de Brian Mathé e Morgan Monchaud. Seb Berthe sónie damb escalar “The Dawn Wall”, era rota mès malaisida deth mon. Entà arribar enquiath Capitan, enes Estats Units, des de Belgica, Seb òpte per un viatge atipic. En pòc temps, forme un equip de sies escaladors, dus marinièrs e un can, entà afrontar eth desafiament e lançar-se ara aventura: navegar entà America en un vaishèt en tot crotzar er Atlantic, e dempús seguir viatge per tèrra damb ua vielha autocaravana mexicana enquia arribar en Yosemite.
Dissabte 16 de març, se projectaràn cinc films mès a compdar des 19:00. Era prumèra filmacion ei “Café Americano” (Seccion Oficiau Mendi Festival 2023), de Ben Page, Joey Schusler e Thomas Woodson. Inspirat per ua fotografia que li ensenhèc eth sòn pair quan ère un mainatge, Shawn Neer s’embarque 20 ans dempús en un viatge per Itàlia ena cèrca deth melhor cafè deth país... E es melhors camins entà biciclètes de montanha. Era dusau projeccion ei “Let It Bärn” (Seccion Oficiau Mendi Festival 2023), de Hannes Tell, ua invitacion a descorbir un movement sosterranh d’escalada que cerque recuperar es carrèrs e es parcs urbans de Berna, eth cap-lòc de Soïssa. Mos guiden en viatge es dus hantaumes de Banksy, autors des guides d’escalada urbana, eth Dr. Bäri e eth Dr. Bomb. Eth 3au film ei “Body of a Line” (Seccion Oficiau Mendi Film Festival 2023), de Henna Taylor. En aguest documentau animat, Madaleine Sorkin empren un viatge intim e creatiu entà escalar era via mès malaisida deth mon en arròca peth dessús des 4.000 mètros: eth Dunn-Westbay Direct (8b+/c) en Longs Peak (Neniisoteyou’o), enes Montanhes Rocoses, Nòrd-america. Eth 4au film ei “The Silent Escape” de Oswald Rodrigo Pereira. Er objectiu de Bartek Ziemski ei escalar eth Annapurna e eth Dhaulagiri, e descener-les en tot esquiar. E eth hestau finalizarà damb “La Gara” (Seccion Oficiau Mendi Festival 2023), de Julen Elorza. Eth Trofèu Kima, La Gara, enes Aups italians, ei ua des corses de montanha mès dures deth mon. Çò que li manque en renòm mondiau, ac compense en còr e identitat. Aguesta ei era istòria d’ua corsa iconica e era recèrca personau dera corredora Hillary Gerardi mentre perseguís un sòn, en un viatge a trauès de païsatges impressionanti: establir ua naua plusmarca femenina dera corsa.
Era entrada as jornades ei gratuïta, enquia completar er aforament dera sala d’Era Audiovisuau, e se poiràn recuélher es entrades fisicament ena sedença deth consistòri en orari abituau, de deluns a diuendres, des 08:00 as 14:00.
“Eth hestau Mendi Tour Vielha ei ua apòsta que des der Ajuntament de Vielha e Mijaran volem mantier, pr’amor que supause un element mès qu’ajude ath nòste municipi a assolidar-mos coma destinacion de referéncia de nauta montanha enes Pirenèus”, comente eth baile de Vielha e Mijaran, Juan Antonio Serrano.
Pera sua part, era mairia deth hestau, era aupinista Edurne Pasaban, afirme qu’”ei un aunor poder tornar a celebrar ua naua edicion d’aguest eveniment, en quau auram films de fòrça qualitat, damb desparièrs espòrts d’aventura, en tot hèr un torn per diuèrsi espòrts d’iuèrn”.
Ath delà, eth prumèr dia deth hestau, ath maitin, er alumnat der Institut d’Aran poirà veir diuèrsi films en un passi privat en Era Audiovisuau. “Volem apropar eth cinèma de montanha as joeni, que son eth futur, e per açò, enguan, tornam a aufrir-les era visualizacion de diuèrsi films deth hestau, e jo madeisha impartirè ua charrada sus es valors dera montanha”, comente Pasaban.
05/03/2024