Notícies Veir istoric
Er Ajuntament de Vielha e Mijaran s’ahig ath Dia Mondiau dera Activitat Fisica damb un complèt programa d’activitats enes installacions municipaus deth 2 ath 6 d’abriu
Pendent toti aguesti dies totes es activitats aufrides seràn gratuïtes, en tot emplegar eth Palai de Gèu, eth Palai d’Espòrts, era pista de pàdel, atau coma ar aire liure
Pendent eth 2 e eth 6 d’abriu, Vielha e Mijaran s’ahig ath Dia Mondiau dera Activitat Fisica (que se commemòre eth 6 d’abriu) damb era celebracion d’un ample programa d’activitats gratuïtes qu’auràn lòc enes desparières installacions esportiues municipaus e ar aire liure.
Er Ajuntament de Vielha e Mijaran, jos eth lèma “Botja-te e viu eros@”, vò encoratjar ara gent a que pogue amiar a tèrme un minim de 30 menutes d’espòrt ath dia.
En aguest sens, Vielha e Mijaran s’ahig, un an mès, ath calendari d’activitats que hèn part deth Plan d’Activitat Fisica, Espòrt e Salut dera Generalitat de Catalunya a compdar de 2005, qu’a coma objectiu difóner es recomanacions d’activitat fisica entà auer ua bona salut e arténher qu’era poblacion sigue mès activa.
Eth calendari d’activitats ei eth següent:
- Dimars 2 d’abriu: Marcha Nordica (nivèu healthy, damb gessuda ena plaça dera glèisa) des 18 as 20 ores, Body Pump (Palai de Gèu) des 19:15 as 20:45 e Tennis taula, basquet e badminton (Palai d’Espòrts) des 19:30 as 21:30.
- Dimèrcles 3 d’abriu: EFM (Palai de Gèu) des 09:10 as 09:55, Aquasalut (Palai de Gèu), des 10:10 as 10:55, Spinning, (Palai de Gèu), des 20:10 as 20:55, e Vòleibol, badminton e tennis taula (Palai d’Espòrts) des 19:30 as 21:30.
- Dijaus 4 d’abriu: Marcha Nordica (nivèu healthy, damb gessuda ena plaça dera glèisa) des 18 as 20 ores, Palai mix (Palai de Gèu) des 19:15 as 20:45 e Fotbòl sala (Palai d’Espòrts) des 19:30 as 21:30.
- Diuendres 5 d’abriu: Stretching (Palai de Gèu) des 09:10 as 09:55, Aquasalut (Palai de Gèu), des 10:10 as 10:55, Bollywood fitness damb Maria (Palai de Gèu), des 18:00 as 18:45 e Pound (Palai de Gèu), des 19:10 as 19:55.
- Dissabte 6 d’abriu: Marcha Nordica (nivèu social, damb gessuda ena plaça dera glèisa) des 09:30 as 13:30.
Ath delà, dissabte 6 d’abriu, i aurà jornada de pòrtes dubèrtes en Palai de Gèu des 10 as 14 ores e des 16:30 as 20:30.
Atau madeish, pendent eth 2 e eth 6 d’abriu, era pista de pàdel serà gratuïta, en tot auer d’anar a cercar era clau ena recepcion deth Palai de Gèu.
Entà poder inscriuer-se as activitats ei de besonh aumplir eth formulari que traparatz en feed (Linktree) des hilats sociaus deth Palai de Gèu.
“Des der Ajuntament de Vielha e Mijaran volem animar ara gent a practicar espòrt, e ac hèm en tot facilitar un ample programa d’activitats gratuïtes enes desparières installacions esportiues municipaus e damb ua jornada de pòrtes dubèrtes ena principau installacion esportiua deth municipi e dera Val d’Aran coma ei eth Palai de Gèu”, comente eth còsso d’espòrts, David Moreno. E ahig que “er espòrt ei de besonh entà poder mantier un estil de vida saludable”.
28/03/2024