Notícies Veir istoric
Vielha serà er epicentre deth milhor patinatge sus gèu es dies 13 e 14 d’abriu damb era celebracion deth Campionat d’Espanha Infantil de Patinatge Artistic
Eth Palai de Gèu, principau installacion esportiua de Vielha e Mijaran e deth conjunt dera Val d’Aran, acuelherà era participacion de 101 patinadors arribadi de diuèrsi lòcs der Estat
Es dies 13 e 14 d’abriu, Vielha e Mijaran serà er epicentre deth milhor patinatge artistic sus gèu d’Espanha, damb era celebracion deth Campionat d’Espanha Infantil de Patinatge Artistic.
Eth Palai de Gèu acuelherà er eveniment que compdarà damb un totau de 101 patinadors arribadi de diuèrsi endrets der Estat. D’aguesti, 5 seràn aranesi, dera escòla de patinatge deth Palai de Gèu, qu’an artenhut ua plaça entà poder participar-i.
Es categories que i preneràn part, autant ena vessant masculina coma femenina, son: Debutants, Basic Novice A, Basic Novice ISU e Intermediate Novice A. I aurà competicion individuau e per parelhes.
“Des der Ajuntament de Vielha e Mijaran èm fòrça satisfèts de poder auer en Palai de Gèu ua competicion de nivèu estatau tanplan importanta coma ei en aguest cas ena disciplina deth patinatge artistic sus gèu”, comente eth còsso d’espòrts, David Moreno. E ahig que “Vielha e Mijaran demòstre, un viatge mès, er ample potenciau qu’a entà recéber eveniments esportius de naut nivèu, en aguest cas d’espòrts d’iuèrn, en tot emplegar eth Palai de Gèu, qu’ei era principau installacion esportiua deth municipi e de tota era Val d’Aran”.
08/04/2024