Notícies Veir istoric
Er Ajuntament de Vielha e Mijaran aumente en un 100% era dotacion annau as Entitats Municipaus Descentralizades enquia 2027
Era aportacion passarà a èster ath torn des 230.000 €, en tot èster un compromís fèrm der equip de govèrn d’Unitat d’Aran de Vielha e Mijaran per balhar supòrt as pòbles deth municipi e auer ua relacion mès pròplèu
En plen ordinari der Ajuntament de Vielha e Mijaran d’aguest dimèrcles, s’a dat compde dera aprobacion deth Decrèt d’Alcaldia peth quau er equip de govèrn d’Unitat d’Aran der Ajuntament de Vielha e Mijaran aumente en un 100% era dotacion economica annau as Entitats Municipaus Descentralizades, en tot èster a compdar d’enguan ath torn des 230.000€, e que serà vigent enquia 2027.
En tot auer-i un aument des ingrèssi enes compdes, s’a favorit precisament aguest increment plan naut de cara as pòbles deth municipi. En aguest sens, es pedanies aqueriràn naues competéncies, en tot dispausar dera gestion dera neteja e dera jardineria.
Atau madeish, s’an aprovat per unanimitat dues mocions de supòrt ara recuelhuda e gstion d’animaus de companhia abandonadi, e de supòrt as reivindicacions deth sector dera pagesia e ramadèr.
D’aute biais, s’a aprovat era modificacion de diuèrses ordenances fiscaus, damb er objectiu de facilitar es tramits administratius de cara as desparières entitats que vòlen desvolopar es sues activitats en Vielha e Mijaran.
“Sò plan satisfèt d’auer aprovat aguest aument dera quantitat qu’er Ajuntament de Vielha e Mijaran apòrte as EMD, en tot mostrar eth fèrm compromís der equip de govèrn d’Unitat d’Aran damb es nòsti pòbles”, comente eth baile de Vielha e Mijaran, Juan Antonio Serrano. E ahig que “gràcies ar aument des ingrèssi ei possible aguest aument, en tot establir ua collaboracion fòrça mès estreta entre eth consistòri e es pòbles, e que pendent quate ans, poderàn gaudir, ath delà d’assomir naues competéncies coma son era neteja e era jardineria”.
10/04/2024