Notícies Veir istoric
Finalizen es trabalhs de reforma des accèssi ath Palai d’Espòrts, ar Skate Park e ara pista de fronton deth Solan de Vielha
Damb aguesta milhora, er Ajuntament de Vielha e Mijaran dignifique es entorns d’aguesti equipaments municipaus que son emplegadi per fòrça gent deth municipi e de tota era Val d’Aran pendent tot er an
Pendent aguesta setmana, er Ajuntament de Vielha e Mijaran ven de finalizar eth projècte de reforma des accèssi ath Palai d’Espòrts, ar Skate park e ara pista de fronton que se trapen en parçan deth Solan de Vielha.
Ua intervencion qu’ère plan de besonh, pr’amor qu’er accès a d’aguesti equipaments se trapaue en un estat fòrça maumerenc peth pas deth temps e es condicions climatologiques advèrses e, damb aguestes òbres, er equip de govèrn municipau a dignificat aguest espaci qu’ei emplegat abituaument non sonque pes vesins de Vielha e Mijaran, senon per gent venguda de tota era Val d’Aran, autant mainadèra coma adults.
En accès ath Palai d’Espòrts, s’a substituït er actuau solèr de husta que se trapaue en un estat tanplan deficient per un nau solèr a base de panòt, fòrça mès segur e eficient. En accès ar Skate Park e ara pista de fronton, se i a bastit un paviment d’hormigon des deth laterau deth Palai d’Espòrts. Ath delà de netejar e rebaishar er airau que s’a pavimentat, en tot milhorar autant er accès coma era seguretat dera zòna.
Es òbres, qu’an estat prèstes en pòque setmanes, an agut un pressupòst de 31.344,89€
“Des der equip de govèrn dignificam aguest espaci esportiu deth Solan de Vielha qu’atrè era preséncia de fòrça gent pendent tot er an as diuèrses installacions municipaus, autant mainadèra coma adults, en tot refortilhar era seguretat des usatgèrs qu’empleguen aguesti equipaments e deisham aguest parçan enes condicions que meriten”, comente eth baile de Vielha e Mijaran, Juan Antonio Serrano. E ahig que “Vielha e Mijaran destaque per auer un hilat d’equipaments esportius de gran nivèu que foncionen a plen rendiment pendent tot er an, enes quaus trabalham entà que siguen enes condicions avientes, e eth bon estat des accèssi tanben forme part d’aguest compromís que volem mantier damb es usatgèrs”.
12/04/2024