Notícies Veir istoric
Er Ajuntament de Vielha e Mijaran a iniciat es òbres de milhora e manteniment des trepadèrs de Vielha que s’alongarà enquia acabar er an
Aguesti trabalhs de manteniment se desvolòpen damb er auançament deth personau contractat entar ostiu e qu’anarà apariant es desperfèctes causadi pendent tot er iuèrn en diuèrsi endrets, en tot milhorar era mobilitat en cap-lòc dera Val d’
Aguesta setmana ja s’a metut en foncionament un important plan de milhora e manteniment des trepadèrs de diuèrsi endrets de Vielha. Er Ajuntament de Vielha e Mijaran desvolòpe aguest projècte damb er auançament dera contractacion deth personau de renfortiment entar ostiu (damb 2 oficiaus e 2 peons), mès que ja s’a metut a disposicion dera brigada municipau a compdar d’aguest mes de mai e que trabalharàn enquiath mes de deseme.
Aguest plan de milhora des trepadèrs se desvoloparà en desparières zònes que son de besonh d’apariar de Vielha (accès a Era Audiovisuau, ath Palai de Gèu, ar Institut d’Aran, entre d’auti). Era meteorologia advèrsa der iuèrn (damb nheuades e gelades, sustot) a provocat pendent es darrèri ans un deteriorament important der estat des trepadèrs de bona part de Vielha, e que genèren era urgéncia dera sua intervencion.
“Damb eth refortiment dera plantilha dera brigada municipau aguesta primauera, mos a permetut organizar es trabalhs entà apariar e mantier es trepadèrs de Vielha”, comente eth baile de Vielha e Mijaran, Juan Antonio Serrano. E ahig que “èm conscienti dera urgéncia d’aguestes intervencions generaus des trepadèrs en Vielha que milhorarà era mobilitat dera gent, e per aquerò auem auançat era contractacion d’ostiu deth personau de supòrt ara brigada a d’aguest mes de mai”.
24/05/2024