Notícies Veir istoric
Er Ajuntament de Vielha e Mijaran digitalize es procèssi de manteniment e incidéncies deth departament d’òbres e servicis
Aguesta naua airina de gestion intèrna permeterà auer ua màger eficiéncia ena gestion des incidéncies, en tot enregistrar toti es trabalhs que desvolòpe eth personau dera brigada
Er equip de govèrn der Ajuntament de Vielha e Mijaran fomente ua milhora subergessenta dera comunicacion intèrna deth consistòri deuant dera aparicion de quinsevolh tipe d’incidéncies en municipi, en tot incorporar era App BQAIT.
Aguesta airina permet enregistrar e controlar facilament er estat des incidéncies que poguen aparéisher entà respóner rapidament a quinsevolh problèma emergent. D’aguesta manèra, eth personau pòt informar, geolocalizar, categorizar e designar ath moment era incidéncia entà crear ua planificacion diària des trabalhs a desvolopar. Ath delà, BQAIT tanben permet generar informes e analisis, en tot aufrir informacion que se pòt emplegar entà milhorar eth servici municipau.
“Damb era implementacion dera App BQAIT milhoram era gestion deth departament d’òbres e servicis en tot establir ua comunicacion entre eth personau dera brigada e es desparièrs departaments intèrns der Ajuntament e es Entitats Municipaus Descentralizades, en tot poder solventar quinsevolha incidéncia dera manèra mès rapida, agila e eficienta”, comente era còsso d’Innovacion e Tecnologia de Vielha e Mijaran, Vanessa Fandiño. E ahig que “er equip de govèrn trabalhe fermament en modernizar e adaptar eth foncionament deth consistòri as naues tecnologies, en tot milhorar era gestion publica”.
27/05/2024