Notícies Veir istoric
Eth plen der Ajuntament de Vielha e Mijaran apròve era 2au modificacion de credit deth pressupòst municipau d’enguan avalorada en 2.849.262,82€
Damb aguesta mesura, se poderàn realizar un contunhat d’accions de milhora enes installacions municipaus, ena via publica, e enes servicis basics d’aigua e enlumenat, entre d’auti airaus
Eth plen der Ajuntament de Vielha e Mijaran a aprovat aué, en session ordinària, era 2au modificacion de credit deth pressupòst municipau de 2024, qu’ei avalorada en 2.849.262,82€.
Cau remercar qu’aguesta modificacion permeterà ath consistòri poder realizar un seguit d’accions de milhora generau deth municipi. En aguest sens, destaquen es 300.000€ destinadi as estudis e trabalhs tecnics entà poder desvolopar futurs projèctes.
En aguesta modificacion tanben s’includís era subvencion des hons Next Generation dera Union Europèa que permeterà ua milhora der enlumenat deth municipi.
Atau madeish, er Ajuntament invertirà 31.552,72€ entà adaptar es hilats d’aigües e retirar eth fibrociment des canerades deth carrèr deth Miei d’Arròs, a demana dera Entitat Municipau Descentralizada d’Arròs e Vila. En çò que tanh ar airau deth subministrament d’aigües, s’invertirà 50.000€ entà bastir ues casetes de proteccion des valvules des depòsits des aigües en Mont, Escunhau e Vila. Ath delà d’aquerir naues valvules tanben per valor de 50.000 € mès.
D’aute biais, se destinarà ua importanta quantitat de sòs ena implementacion de semafòrs pedagogics en Vielha, per valor de 55.000€, en tot conscienciar as conductors sus era velocitat avienta entà circular per laguens dera poblacion.
Tanben s’invertirà 100.000€ ena crompa de naus fanaus entà poder milhorar er enlumenat de tot eth municipi en cas de patir incidéncies d’aguest tipe.
Ena via publica s’aquerirà nau mobiliari urban (bancs e paperères) per valor de 40.000€ entà poder substituïr es que siguen maumerencs e ac agen de besonh, en tot milhorar era imatge des pòbles.
Tanben se destinarà 36.332€ entà ampliar eth pati de primària dera Escòla Garona, en tot abilitar ua zòna verda que harà mès gran aguest pati.
“Aguesta naua modificacion de credit deth pressupòst municipau permeterà que des der equip de govèrn pogam contunhar en tot milhorar es servicis basics ara ciutadania, ja sigue en subministraments, era via publica e es installacions municipaus”, comente eth baile de Vielha e Mijaran, Juan Antonio Serrano.
29/05/2024