Notícies Veir istoric
Er Ajuntament de Vielha e Mijaran trè a licitacion era redaccion deth projècte de reurbanizacion e direccion d’òbres dera Plaça dera Glèisa de Vielha
Aguest plan preten convertir-la en un endret mès representatiu damb màger qualitat, en tot apariar es escales d’accès ara Avenguda Pas d’Arró e en tot milhorar era connectivitat damb eth carrèr Sarriulèra e era bastissa der Ajuntament
Er equip de govèrn der Ajuntament de Vielha e Mijaran acabe de trèir a licitacion era redaccion deth projècte e era direccion des òbres de reurbanizacion dera Plaça dera Glèisa de Vielha. Ua intervencion que s’emmarque laguens deth projècte estrategic de milhora deth casc antic deth cap-lòc dera Val d’Aran, a on era Plaça dera Glèisa se place coma un punt centrau.
Aguest plan contemple convertir aguest endret en un parçan mès representatiu damb màger qualitat, en tot apariar es escales d’accès ara Avenguda Pas d’Arró e en tot milhorar era connectivitat damb eth carrèr Sarriulèra e era bastissa der Ajuntament. Non se desvoloparà un cambi important en çò que tanh ath sòn foncionament, mès òc qu’ei prevista ua milhora ena qualitat des acabats dera accessibilitat.
Eth projècte supausarà era milhora der equipament fixe e eth mobiliari urban, era pavimentacion, es accèssi e er estudi de milhora der enlumenat. Ath delà, aurà de respectar era singularitat dera glèisa Sant Miquèu e er entorn deth casc antic e preveir er equipament der espaci damb ajardinament.
Aguest projècte ges a licitacion damb un pressupòst de 16.698€. Eth tèrme de presentacion d’aufèrtes finalize eth pròplèu 6 de junh.
“Des der Ajuntament de Vielha e Mijaran volem milhorar era imatge que presente er espaci dera Plaça dera Glèisa de Vielha, coma èish centrau, a on fòrça gent, autant vesins coma visitaires, i transite a diari, de manèra que potenciam aguest endret coma part deth projècte de milhora deth casc antic que des der equip de govèrn portam fòrça ans en tot desvolopar”, comente eth baile de Vielha e Mijaran, Juan Antonio Serrano.
12/06/2024