Notícies Veir istoric
Vielha e Mijaran e Barcelona s’alien entà trabalhar en compromís dera milhora der accès ara viuenda des sòns ciutadans
Pendent era amassada d’aguest dijaus en Barcelona deth baile de Vielha e Mijaran, Juan Antonio Serrano, e deth baile de Barcelona, Jaume Collboni, ambdus priorizen er objectiu de que non i age cap pis toristic en noveme de 2028 enes dus municip
Eth baile der Ajuntament de Vielha e Mijaran, Juan Antonio Serrano, s’a amassat en Ajuntament de Barcelona damb eth sòn omonim, Jaume Collboni, entà tractar ahèrs comuns en airau der accès ara viuenda en ambdus municipis.
En aguest amassada, Serrano e Collboni refortilhen eth sòn compromís de priorizar era garantia deth dret ar abitatge des sòns ciutadans. Aguest compromís se centre en aplicar eth Decret lei dera Generalitat de Catalunya de regulacion des pisi toristics damb er objectiu de qu’en noveme de 2028, autant en Vielha e Mijaran coma en Barcelona ja non n’i age cap.
Cau remercar qu’actuaument Vielha e Mijaran compde damb mès de 300 pisi toristics damb licéncia mentre que Barcelona n’a 10.101. Damb era aplicacion d’aguesta mesura, se recuperarien totes aguestes viuendes que se meterien a disposicion des ciutadans abituaus e permanents d’ambdus municipis. Eth Decret lei permet era recuperacion der usatge residenciau de fòrça pisi enquiara destinadi ath torisme. Atau madeish, era normatiua establís qu’aqueri municipis que presenten problèmes en accès ara viuenda o que ja dispausen de 5 pisi toristics per cada 100 abitants, o ben que complissen es dus requisits, era activitat des pisi toristics sonque ei compatible damb er emplec d’abitatge s’ac permet expressament eth planejament urbanistic e tostemp que se justifique que i a pro solèr entar abitatge destinat ath domicili abituau e permanent dera poblacion residenta.
Precisament, Vielha e Mijaran e Barcelona son dus des municipis qu’an aguest problèma en accès ar abitatge segontes es criteris deth Decret lei. En aguest sens, Serrano e Collboni an anonciat que non impulsaràn cap nau planejament urbanistic que declare compatible er emplec toristic der abitatge damb eth de domicili abituau e permanent e, qu’ath delà, en 5 ans toti es pisi toristics desapareisheràn. Ei a díder, en noveme de 2028.
Vielha e Mijaran a estat un des municipis pionèrs ena luta contra era expansion des pisi toristics, en tot arturar era concession des licéncies pendent diuèrsi ans, e qu’a compdar d’aguest 1 de junhsèga, ei declarat coma Zòna de Mercat Residenciau Tensionat, d’ençà dera publicacion dera resolucion TER/2408/2024 deth Departament de Territòri dera Generalitat de Catalunya, que permet, entre d’autes mesures, aplicar eth limit maximal deth prètz de loguèr des viuendes en aqueri abitatges que non auessen cap contracte d’arrendament enes darrèri cinc ans.
“Era problematica der accès ara viuenda ei un ahèr transversau, existís enes granes ciutats coma Barcelona atau coma en Pirenèu, coma ei Vielha e Mijaran. A arraïtz dera nauta preséncia de pisi toristics, i a fòrça familhes que non pòden renauïr es contractes de loguèr, tanben se genèren fòrça problèmes de convivéncia enes comunitats de vesins e ei plan complicat trapar professionaus de fòrça mestièrs, coma per exemple era educacion o era sanitat, que volguen vier entath nòste municipi”, comente eth baile de Vielha e Mijaran, Juan Antonio Serrano. Atau madeish, Serrano hè ua crida ath futur Govèrn dera Generalitat de Catalunya e a toti es partits deth Parlament de Catalunya entà que “mantenguen aguest Decret lei coma airina entà milhorar er accès ar abitatge e eradicar aguesta situacion dramatica qu’auem en Vielha e Mijaran e en bona part deth Pirenèu”.
04/07/2024