Notícies Veir istoric
Aguest dissabte 20 de junhsèga, se celèbre era 3 edicion dera Vielha Cycling Tour damb gessuda e arribada en Vielha
Mès de 900 ciclistes participaràn en aguest eveniment non competitiu que trauèsse bona part des pòrts de montanha dera Val d’Aran e sud de França, en tot assolidar Vielha e Mijaran coma epicentre esportiu en Pirenèu
Dempús deth succès des prumères edicions, arribe era 3au edicion dera Vielha Cycling Tour aguest dissabte 20 de junhsèga.
Aguesta pròva non competitiua, aurà Vielha coma lòc de gessuda e d’arribada (deuant dera plaça dera glèisa), e trauessarà bona part dera orografia dera Val d’Aran e deth sud de França.
Se demore era participacion de mès de 900 participaires. Era Vielha Cycling Tour ei un eveniment organizat peth Club Ciclista Vielha, e qu’ei compausat de dues distàncies: Era de Miei Hons, de 90 kms, damb era pujada as pòrts deth Plan Batalhèr, Pòrt deth Portilhon (2 viatges), Guardader d’Arres e arribada en Vielha, e era Gran Hons, de 155 kms, damb es madeishi pòrts, e damb er ahijut deth Pòrt de Balès.
“Èm fòrça satisfeti de qu’era Vielha Cycling Tour torne a celebrar-se enguan, en tot assolidar a Vielha e Mijaran coma epicentre esportiu sostenible en Pirenèu”, comente eth baile de Vielha e Mijaran, Juan Antonio Serrano. E ahig que “a despièt de non èster ua pròva competitiua, fòrça gent i prenerà part e açò beneficiarà ath sector toristic deth municipi pendent aguesta pròplèu dimenjada”.
D’aute biais, eth còsso d’espòrts, David Moreno, afirme que “ei ua grana notícia qu’era Vielha Cycling Tour age ua naua edicion, e que demoram que pogue assolidar-se en calendari d’ostiu de pròves esportiues deth nòste municipi pendent es pròplèu ans”.
18/07/2024