Notícies Veir istoric
Vielha e Mijaran e era Unió de Federacions Esportiues de Catalunya (UFEC) mantien ua jornada de trabalh entà definir eth futur esportiu deth Palai de Gèu
Aguest diuendres eth president dera UFEC, Gerard Esteva, a agut ua amassada de trabalh damb er equip de govèrn municipau e a visitat es installacions, en tot comprovar eth sòn estat e totes es accions que s’amien a tèrme
Er Ajuntament de Vielha e Mijaran e era Unió de Federacions Esportives de Catalunya (UFEC) an mantengut ua jornada de trabalh en consistòri entà definir era viabilitat esportiua deth Palai de Gèu.
Pendent era jornada d’aguest diuendres, eth president dera UFEC, Gerard Esteva, acompanhat dera secretària generau dera UFEC, Isabel Pérez e deth president dera Federació Catalana d’Entitats Excursionistes de Catalunya, Jordi Merino, a agut ua amassada de trabalh damb er equip de govèrn municipau e a visitat es installacions deth Palai de Gèu e en tot comprovar eth sòn estat e totes es accions que s’amien a tèrme d’ençà der inici dera collaboracion entre ambdues institucions.
Enguan, a arraïtz d’aguesta collaboracion, era UFEC contribusís damb toti es coneishements de besonh qu’an en matéria de gestion esportiua entà balhar supòrt ath consistòri ena gestion dera installacion esportiua municipau.
Ena amassada tanben i a assistit er assessor fixe qu’era UFEC apòrte, des deth mes de gèr ençà, en Palai de Gèu entà ajudar ara direccion der equipament en materia d’inversions, manteniment, gestion esportiua e comerciau que siguen de besonh amiar a tèrme.
Ath delà, se trabalhe ena elaboracion d’un plan estrategic de viabilitat que pogue establir ua huelha de rota a seguir, en tot assolidar eth futur deth Palai de Gèu.
“Gràcies ath supòrt que mos balhe era UFEC des d’enguan, trabalham entà dessenhar un plan estrategic que garantise era viabilitat esportiua deth Palai de Gèu entàs pròplèu ans, e que sigue ara disposicion des naues generacions coma referent esportiu de Vielha e Mijaran e de tota era Val d’Aran”, comente eth baile der Ajuntament de Vielha e Mijaran, Juan Antonio Serrano. E ahig que “era UFEC compde damb experiéncia ena gestion esportiua en desparières installacions esportiues de Catalonha, e entre toti desvolopam e desvoloparam tota sòrta d’accions que siguen de besonh entà qu’es nòsti usatgèrs agen es milhors condicions e activitats possibles, qu’ei çò que merite Vielha e Mijaran.
26/07/2024