Notícies Veir istoric
Eth pròplèu dimars 1 d’octobre arrinque ua naua edicion der “Espòrt Popular” de Vielha e Mijaran
Coma ei abituau, se pòt practicar gratuïtament bàsquet, tennis taula, badminton, fotbòl sala e vòlei, repartits de deluns a dijaus, en Palai d’Espòrts de Vielha, en orari de 19:30 a 21:30
Eth pròplèu dimars 1 d’octobre s’encète ua naua edicion der Espòrt Popular, eth programa d’activitats esportiues qu’er Ajuntament de Vielha e Mijaran, amassa damb eth Conselh Esportiu dera Val d’Aran, amie a tèrme enquiath pròplèu mes de junh en Palai d’Espòrts de Vielha.
Aguest cicle esportiu ei gratuït e, coma ja ei abituau, se pòt gaudir de deluns a dijaus en orari de 19:30 a 21:30. Eth programa ei eth següent: Deluns tennis taula, basquet e badminton, dimars fotbòl sala, dimèrcles vòlei, badminton e tennis taula e dijaus fotbòl sala femenin. Precisament, eth fotbòl sala femenin, qu’en anterior cors s’aufric en mai coma pròva pilòt, enguan se poderà gaudir a compdar deth mes d’octobre, en tot comprovar eth succès de participaires que i auec.
A compdar de 2017 era activitat a enregistrat ua bona participacion. Ena passada legislatura s’inicièc aguest projècte esportiu coma part deth Plan d’Activitat Fisica d’Espòrt e Salut, damb eth qu’eth consistòri preten fomentar ua vida saludabla ena ciutadania a trauès d’activitats dirigides, en tot practicar diuèrsi espòrts.
Aguesta activitat, amassa damb d’autes coma era Marcha Nordica, que tanben ei ua accion gratuïta impulsada per Ajuntament de Vielha e Mijaran, faciliten era integracion des joeni e des adults, en tot practicar espòrt en un orari que permet era conciliacion familhau.
“Des der Ajuntament volem contunhar en tot fomentar ua vida saludabla dera nòsta gent damb era practica esportiva. Era gratuïtat der Espòrt Popular, atau coma d’autes activitats coma ei era Marcha Nordica, a coma objectiu facilitar er accès des ciutadans ar espòrt, en tot integrar-se ena vida vesiau e garantir eth sòn benèster”, afirme eth dusau tinent d’alcalde e còsso d’espòrts, David Moreno. E hig que “tanben pretenem apropar es installacions esportives municipaus ara gent, entà que les poguen gaudir”.
Er Espòrt Popular serà en marcha enquiath pròplèu 30 de junh. Entà obtier mès informacion sus er Espòrt Popular, o d’autes activitats esportives qu’aufrís er Ajuntament de Vielha e Mijaran, podetz contactar a info@vielha-mijaran.org o en telefòn 670503776.
24/09/2024