Notícies Veir istoric
Er Ajuntament de Vielha e Mijaran tornarà a daurir eth Centre de Joenessa “Antara” un viatge adjudicat eth servici de dinamizacion e coordinacion der espaci enquia 2028
Des de 2018 a estat er endret de léser de referéncia dera joenessa deth municipi e demorarà dubèrt de diuendres a dimenge en orari des 17 as 21 ores, d’octobre a junh, e tota era setmana enes hèstes de Pasca e Nadau
Eth Centre de Joenessa “Antara” de Vielha tornarà a daurir es sues pòrtes aguest mes d’octobre, dempús de qu’er Ajuntament de Vielha e Mijaran age adjudicat eth servici de dinamizacion e coordinacion der espaci.
Antara ei un equipament der Ajuntament de Vielha e Mijaran destinat ara joenessa deth municipi a on traparàn un espaci de participacion, de relacion e de dinamizacion entà favorir era coesion sociau, potenciar era interrelacion e prebotjar era plea ciutadania dera nòsta joenessa. Ei un servici public e gratuït a on era joenessa pòt trobar un ample ventalh d’informacion e orientacion sus educacion, formacion, participacion, òci, salut, cultura, léser, concorsi, viatges, mobilitat internacionau…e que compde damb professionaus en encastre dera joenessa entà assessorar-les e acompanhar-les. En aguest sens, s’i realizen activitats formatiues sus ahèrs d’actualitat e que les ajuden de cara ath futur en matéries coma: violéncia sexuau, consum d’alcoòl, expectatiues laboraus e d’estudis. Ath delà, tanben s’a començat a implementar espòrts coma badminton o tennis taula entà ajudar ara coesion sociau.
Antara siguec inaugurat en 2018 e des d’alavetz a estat eth centre de léser de referéncia entara joenessa de Vielha e Mijaran pendent es dimenjades que dure eth cors escolar. Er orari abituau serà des 17 as 21 ores de diuendres a dimenge, atau coma tota era setmana entièra enes epòques hestiues de Pasca e Nadau.
Eth centre ei abilitat entara joenessa des 12 as 18 ans. Eth reng d’edat mès abituau en darrèr cors siguec des 14 as 17 ans, ua donada mès anauta qu’enes prumèri ans d’Antara (a on se plaçaue entre es 12 e es 15 ans), pr’amor qu’es adolescenti d’aguestes edats, ja comencèren a vier entath centre quan èren mès petiti. En cors 2022-23 auec ua assisténcia de mès de 1700 usatgèrs, enes mès de 70 jornades que siguec dubèrt, damb ua miejana de 25 joeni per tarde, eth registre mès anaut d’ençà dera sua dubertura en 2018.
“Èm erosi de poder tornar a daurir eth Centre de Joenessa “Antara” a compdar d’aguesta tardor, pr’amor que des dera sua dubertura en 2018, s’a establit coma eth principau espaci de léser entara nòsta joenessa, e des der Ajuntament de Vielha e Mijaran apostam fermament entà qu’atau seguisque”, comente eth còsso de joenessa de Vielha e Mijaran, David Moreno. E ahig que “tornaram a gaudir de fòrça activitats adaptades as edats des usatgèrs que venguen tà Antara, sustot, en tot pensar en que poguen hèr-se-lo sòn, mès tanben conscienciar-les de cara ara sua vida adulta”.
Era adjudicacion deth servici de dinamizacion e coordinacion d’Antara a estat adjudicat enquia 2028, damb un pressupòst totau de 60.137€.
27/09/2024