Notícies Veir istoric
Vielha e Mijaran apròve era 3au modificacion de credit deth pressupòst municipau per valor de 76.638,56€
Eth 44% dera partida d’aguesta modificacion anarà destinada a ajudar ara EMD d’Escunhau e Casarilh a pavimentar eth Carrèr Sant Sebastian
Eth plen der Ajuntament de Vielha e Mijaran, amassat aguest dimèrcles en session ordinària, a aprovat era 3au modificacion de credit deth pressupòst municipau de 2026, per valor de 76.638,56€. Era totalitat d’aguesta modificacion ei finançada damb romanent de tresaureria deth consistòri.
Era partida mès subergessenta, ei era destinacion de 34.014,26€ (eth 44% dera quantitat totau dera modificacion) coma transferéncia de capitau ara Entitat Municipau Descentralizada d’Escunhau e Casarilh entara pavimentacion deth Carrèr Sant Sebastian.
D’aut biais, tanben se substituirà era parabanda existenta en Carrèr dera Querimònia de Vielha, plaçada sus er arriu Garona, en tot plaçar-ne ua de naua, qu’ath delà serà enlumenada, entà garantir-ne era sua seguretat en ores de mens lum solar. E, tanben se poderà substituir er enlumenat dera Sala Era Audiovisuau de Vielha.
En d’aute punts dera orde deth dia, s’a procedit ara aprobacion iniciau deth Plan Locau de Seguretat Viària de Vielha e Mijaran 2025-28, que garantís era coneishença des punts critics ena seguretat des pedons, sustot enes entorns escolars, e es mesures qu’i cau aplicar.
Pendent eth plen, tanben a prenut possession deth sòn cargue eth nau còsso deth grop municipau d’Aran-Amassa, Emilio Rey, en substitucion de Julian Fernández.
“En aguesta modificacion de credit invertim ua quantitat de sòs nauta entà ajudar ara EMD d’Escunhau e Casarilh, pr’amor qu’entar equip de govèrn municipau ei fondamentau ajudar e collaborar damb es nòsti pòbles en tot çò qu’agen de besonh, e que sigue laguens des nòstes possibilitats. D’ací qu’eth 44% dera modificacion de credit sigue entà milhorar era pavimentacion deth Carrèr Sant Sebastian d’Escunhau, qu’ei ua des vies principaus e èish vertebrador deth pòble”, soslinhe eth baile de Vielha e Mijaran, Juan Antonio Serrano.
Lieger mès
27/05/2026
Aguest dissabte, 23 de mai, se daurís era convocatòria de subvencions de Vielha e Mijaran de 2026
Lieger mès
22/05/2026
Deth 24 ath 31 de mai, Vielha e Mijaran acuelherà es actes dera Setmana dera Natura de Vielha e Mijaran
Lieger mès
18/05/2026
Er Ajuntament de Vielha e Mijaran amie a tèrme era milhora integrau dera cubèrta e des espacis interiors deth Tanatòri Municipau de Vielha e Mijaran
Lieger mès
