Notícies Veir istoric
Er Ajuntament de Vielha e Mijaran destine en cors escolar 2024-25 un totau de 6.000€ ara AFA dera Escòla Garona tà subvencionar era crompa de nau equipament informatic ar alumnat de 4au de Primària
Enguan eth consistòri doble era quantitat abituau que balhe ara AFA entar aquesiment d’aguest equipament e que tanben anarà destinada entà quinsevolha activitat qu’era AFA volgue realizar laguens o dehòra deth centre escolar
Er Ajuntament de Vielha e Mijaran a formalizat er acòrd de collaboracion damb era Associacion de Familhes e Alumnes (AFA) dera Escòla Garona de cara ath cors escolar 2024-25.
En aguest sens, eth consistòri a signat un convèni damb era AFA dera Escòla Garona de Vielha entara ajuda ena crompa de naui ordenadors que poderàn gaudir es escolans/es de 4au cors dera Educacion Primària, mès tanben entà quinsevolha activitat qu’era AFA volgue realizar laguens o dehòra deth centre escolar. D’aguesta manèra, es escolans auràn equipament informatic en condicions avientes entà poder seguir eth desvolopament abituau des classes.
En cors escolar passat non siguec de besonh era abituau ajuda de 3.000€, per aquerò enguan s’a compensat en tot balhar aguesti naui 3.000€ que serviràn entà qu’er alumnat pogue realitzar mès activitats.
“Des der Ajuntament de Vielha e Mijaran èm conscienti qu’era Escòla Garona a de besonh equipaments informatics en bones condicions, mès encara en mon digitau que viuem aué dia, entà poder prestar un servici d’ensenhament de qualitat entàs nòsti/es escolans/es”, comente eth 2au tinent d’alcalde e còsso d’ensenhament de Vielha e Mijaran, Alberto López. E hig que “er Ajuntament tostemp a apostat per collaborar en çò qu’agen de besonh es centres educatius de Vielha e Mijaran, entà qu’es joeni/es agen es màgers facilitats possibles ena sua formacion academica. Per aquerò enguan doblam era quantitat destinada a d’aguesti ahèrs”.
03/10/2024