Notícies Veir istoric
Er Ajuntament de Vielha e Mijaran renauís era collaboracion damb er Institut d’Aran entà tornar a méter en foncionament eth programa de servici comunitari en actuau cors escolar
Ath torn de 100 alumnes de 3au cors dera ESO realizaràn desparièrs trabalhs en equipaments publics coma era Escòla Mairau, eth Palai de Gèu e eth Centre de Joenessa, entre d’auti
Eth 2au tinent d’alcalde e còsso d’educacion der Ajuntament de Vielha e Mijaran, Alberto López, s’a amassat damb era cap d’estudis der Institut d’Aran, Pilar Lladonosa, entà tornar a méter en foncionament a compdar deth mes d’hereuèr eth programa de servici comunitari damb er alumnat deth centre, dempús deth succès artenhut pendent eth cors escolar passat, ena pròva pilòt, damb 90 alumnes.
Enguan, ath torn de 100 alumnes de 3au cors dera ESO desvoloparàn trabalhs de servici comunitari a trauès de desparièrs servicis e activitats publiques. En totau, seràn 10 ores cadun entre es mesi de noveme e junh.
Er objectiu d’aguest projècte de servici comunitari ei milhorar es besonhs der entorn e participar actiuament ena vida sociau.
En Vielha e Mijaran, er alumnat poirà desvolopar es practiques enes principaus equipaments publics: era Escòla Mairau “Era Cunhèra”, eth Palai de Gèu, eth Centre de Joenessa “Antara”, era Bibliotèca Generau de Vielha e eth Casau deth Jubilat “Sant Miquèu” de Vielha. Atau coma ena activitat dera Marcha Nordica ar aire liure.
Er Ajuntament de Vielha e Mijaran ei plan comprometut damb poder balhar ua escadença ar alumnat der Institut d’Aran entà iniciar-se en mon laborau a trauès dera administracion publica. En aguest sens, dejà hè fòrça ans que tanben collabòre damb eth FP Dual de Gestion Administratiua deth pròpri Institut d’Aran, en tot auer alumnes en practiques ena Bibliotèca, eth Palai de Gèu e ena Oficina Tecnica der Ajuntament.
“Des der Ajuntament de Vielha e Mijaran credem qu’ei fòrça positiu entar alumnat de 3au dera ESO der Institut d’Aran poder realizar activitats de servici comunitari, pr’amor que lis servirà entà madurar e formar-les de cara ara sua vida adulta, en tot ajudar-les a conéisher milhor coma foncione era vida vidanta dehòra der airau escolar”, comente eth 2au tinent d’alcalde e còsso d’educacion der Ajuntament de Vielha e Mijaran, Alberto López. E ahig que “damb aguest projècte seguim en tot mantier era collaboracion deth consistòri damb er Institut d’Aran, que ja auem des de hè fòrça ans, en tot ajudar ena formacion des alumnes de cara ath sòn futur ena vida adulta, en tot emplegar es equipaments publics”.
05/10/2024