Notícies Veir istoric
Eth plen der Ajuntament de Vielha e Mijaran apròve era adaptacion des ordenances fiscaus, taxes e prètzi publics entar an 2025
Aguesta adaptacion deth 3,5% se produsís d’acòrd ara evolucion der Index de Prètzi de Consum (IPC) annau
En plen ordinari der Ajuntament de Vielha e Mijaran celebrat aguest maitin s’a aprovat era adaptacion des ordenances fiscaus, taxes e prètzi publics entar exercici 2025.
Aguesta mesura a coma objectiu implementar ua milhora des servicis qu’actuaument prèste er Ajuntament de Vielha e Mijaran vèrs era ciutadania, atau coma fomentar ua modernizacion qu’ei de besonh dera administracion.
Era modificacion a estat aprovada damb es vòts a favor des membres deth govèrn municipau d’Unitat d’Aran e eth vòt en contra dera oposicion de Convergéncia Aranesa e Aran-Amassa.
Es impòsti que se modificaràn, ac haràn en consonància damb era evolucion der IPC. Er Impòst sus Bens Immòbles (IBI) passarà de 0,67 a 0,69 en bens immòbles urbans, en tot demorar Vielha coma un des cap-lòcs des comarques de Lhèida damb eth tipe mès baish, e eth mès baish en relacion ara rèsta de municipis dera Val d’Aran.
En çò que tanh ar Impòst sus Veïculs de Traccion Mecanica, i aurà ua actualizacion entà tota classa de veïculs, en tot aument der 1,85 actuau a 1,89.
Damb er impòst sus es construccions, installacions e òbres (ICIO), se produsirà un aument deth 3,75 actua a 3,88.
Er aute impòst que se modificarà serà eth des activitats economiques (IAE). En aguest cas, se modifique era categorizacion, en tot fomentar era activitat enes terçons de Marcatosa e Castièro.
D’aute biais, eth plen der Ajuntament de Vielha e Mijaran tanben a aprovat eth calendari des hèstes locaus deth municipi
“Enquiar exercici de 2024 taxes e prètzi publics non auien patit cap adaptacion en 8 ans, de manèra qu’era qualitat des servicis que prèste er Ajuntament de Vielha e Mijaran se resentís e açò mos ac cau evitar. Per aquerò ei de besonh adaptar-les as còsti reaus, en tot patir ua naua actualizacion generau entà 2025”, comente eth baile der Ajuntament de Vielha e Mijaran, Juan Antonio Serrano. E ahig que “ei de besonh aguest a adaptacion des impòsti e taxes entà poder amiar a tèrme inversions en projèctes de milhora e manteniment de diuèrsi servicis, coma ei, per exemple, eth des aigües lordes e aumentar era dotacion economica as EMDs”.
09/10/2024