Notícies Veir istoric
Er Ajuntament de Vielha e Mijaran met en marcha, a compdar deth 19 d’octobre, ua naua edicion deth Teatre Familhar que s’amiarà a tèrme un dissabte ath mes, d’octobre a mai
Era nauetat d’enguan ei era disponibilitat d’un abonament economic de tota era tempsada per 35€ que se pòt aquerir en consistòri
Er Ajuntament de Vielha e Mijaran torne a méter en foncionament, a compdar d’aguesta tardor, eth cicle Teatre Familhar damb eth qu’aufrirà espectacles entà que toti es membres dera familha poguen gaudir d’ua serada tanplan divertida, entre es mesi d’octobre e mai.
Dempús deth succès des edicions anteriores, enguan s’a premanit un nau cicle compausat de 8 espectacles qu’auràn lòc un viatge ath mes, ena jornada de dissabte, a compdar des 18 ores ena Sala Era Audiovisuau de Vielha.
Era nauetat d’enguan ei era disponibilitat d’un abonament economic de tota era tempsada per 35€ que se pòt aquerir en consistòri.
En çò que tanh as espectacles de 2024, eth cicle s’encète eth 19 d’octobre damb era òbra “Kissu” dera companhia Titelles de Lleida. Eth 23 de noveme, Jam mos portarà er espectacle “Hats”, ua actuacion de palhasso damb era qu’arriram fòrça, e eth 14 de deseme Txema Muñoz mos aufrirà “Gota”, un espectacle de màgia nouvelle e palhasso contemporani.
“Des der equip de govèrn der Ajuntament de Vielha e Mijaran auem establit un programa variat entà que pendent es pròplèu 8 mesi tota era familha pogue gaudir de diuèrsi espectacles agradius”, comente era còsso de cultura, Raquel Martínez. E ahig que “era bona acuelhuda qu’aguest tipe d’activitats culturaus a enes familhes mos permet seguir en tot apostar per apropar companhies de prestigi, en tot emplegar, en aguest cas, Era Audiovisuau coma lòc de celebracion d’aguesti espectacles. A arraïtz dera nauta preséncia de public, auem decidit crear un abonament de tempsada a un prètz economic, entà que tota era familha pogue vier a gaudir deth teatre”.
14/10/2024