Notícies Veir istoric
Eth Conselh dera Vila s’a amassat entà parlar sus era modificacion e creacion de diuèrses ordenances municipaus impulsades per Equip de Govèrn der Ajuntament de Vielha e Mijaran
Aguest Conselh ei eth maxim òrgan consultiu e de participacion ciutadana municipau, e compde damb era representacion de desparièrs sectors dera societat entà parlar sus es ahèrs que mès preocupen as vesins e vesies
Aguest dimars s’a celebrat ua naua amassada deth Conselh dera Vila. En aguesta reünion qu’a agut lòc ena Sala de Plens der Ajuntament de Vielha e Mijaran e qu’a estat presidida peth president deth Conselh dera Vila e baile municipau, Juan Antonio Serrano, s’a parlat sus era modificacion e creacion de diuèrses ordenances municipaus impulsades per Equip de Govèrn der Ajuntament de Vielha e Mijaran.
Concretaments, s’a parlat sus es ordenances de possession d’animaus, convivéncia ciutadana, circulacion e publicitat. Ara madeish, ei en marcha un procès de participacion ciutadana de 30 dies entà que quinsevolh vesin pogue aportar es sues idèes, abans de qu’ua comission tecnica hèsque un auantprojècte que se lheuarà ath pròplèu plen der Ajuntament de Vielha e Mijaran previst entath mes de noveme.
Aguest Conselh ei eth maxim òrgan consultiu e de participacion ciutadana municipau, e compde damb era representacion de desparièrs sectors dera societat entà parlar sus es ahèrs que mès preocupen as vesins e vesies, siguec creat en 2019, que s’amasse periodicament, que compde damb representants de diuèrsi sectors dera societat civiu entà establir ua vinculacion dirècta entre er Ajuntament de Vielha e Mijaran e era ciutadania, en tot tractar aqueri ahèrs que preocupen as vesins e vesies, en tot fomentar eth desvolopament deth municipi.
Segontes eth baile de Vielha e Mijaran, Juan Antonio Serrano, “aguestes amassades permeten ar Equip de Govèrn préner decisions consensuades damb era ciutadania e podem transméter es problèmes e dificultats damb es que mos trapam ena vida vidanta entà cercar solucions conjuntes”. E ahig que “ei important qu’era ciutadania pogue préner part d’aguest procès participatiu dera modificacion e creacion des ordenances municipaus, pr’amor que son d’ua especiau importància entara convivéncia de toti”.
23/10/2024