Notícies Veir istoric
Er Ajuntament de Vielha e Mijaran aufrís un inventari de terrens de titolaritat deth pròpri consistòri, ath Conselh Generau d’Aran, a on s’i poderie bastir abitatge public
Eth Conselh Generau d’Aran a includit es terrens der Ajuntament de Vielha e Mijaran en un inventari qu’a hèt arribar ath Ministèri d’Abitatge e ara Generalitat de Catalunya
Er Ajuntament de Vielha e Mijaran seguís en tot trabalhar entà poder facilitar qu’es vesins deth municipi poguen auer ua viuenda accessibla. En aguest cas, a aufrit ath Conselh Generau d’Aran un inventari damb es terrens que son titolaritat deth pròpri consistòri, entà èster includidi laguens d’un catalòg de terrens a on se poderie bastir abitatge public ena Val d’Aran.
Laguens d’aguest inventari s’i trapen 7 terrens publics: 4 en Vielha, 1 en Betren, 1 en Mont e 1 en Arròs. Aguesti terrens conformen ua superfísia totau de 6.195 m², enes que i poirie auer ua capacitat d’enquia 176 abitatges de proteccion oficiau.
Er Ajuntament de Vielha e Mijaran, amassa damb eth Conselh Generau d’Aran, an hèt arribar aguest inventari de terrens publics ath Ministèri d’Abitatge, per un costat, e tanben ara Generalitat de Catalunya.
D’aute biais, es presidents des Entitats Municipaus Descentralizades se trapen en tot trabalhar damb es servicis tecnics municipaus entà poder acabar de definir es terrens qu’es desparières pòbles an dera sua titolaritat entà hèr-les-ac a arribar autant ar Estat, coma ara Generalitat.
“Des der Ajuntament de Vielha e Mijaran volem aufrir totes es facilitats entà qu’es administracions que pòden promòir abitatge sociau poguen bastir viuenda publica en nòste municipi. E, per açò, collaboram damb eth Conselh Generau d’Aran entà qu’es nautes administracions, coma son eth Govèrn Espanhòu e era Generalitat de Catalonha, agen constància deth catalòg de terrens possibles, entà hè’c possible”, comente eth baile der Ajuntament de Vielha e Mijaran, Juan Antonio Serrano. E ahig que “er accès ara viuenda ei un des ahèrs fonamentaus der equip de govèrn municipau. Portam fòrça temps en tot trabalhar entà trapar solucions ara dificultat der accès entà joeni, familhes e trabalhadors, en un municipi qu’ei declarat zòna de mercat residenciau tensionada pera Generalitat de Catalunya”.
24/10/2024