Notícies Veir istoric
Dejà an començat es òbres de milhora deth subministrament d’aigua e eth hilat de sanejament dera part baisha dera Avenguda Baile Calbetó Barra de Vielha
Se bastirà un hilat separatiu d’aigües pluviaus e d’aigües lordes, tanben se milhorarà eth hilat d’aigua correnta damb materiaus mès avienti entath subministrament, se milhoraràn es trepadèrs e s’i plaçarà paviment engondronat entà
Er Ajuntament de Vielha e Mijaran a iniciat es trabalhs de milhora dera accessibilitat e adaptacion des hilats deth servici d’aigua correnta e aigües lordes en tram baish dera Avenguda Baile Calbetó Barra de Vielha.
Eth projècte compde damb un pressupòst de 191.756,14€ e serà prèst abans der inici dera sason d’iuèrn. Damb aguest projècte eth govèrn municipau amie a tèrme diuèrses intervencions damb er objectiu de modernizar aguesti hilats d’aigua. En çò que tanh ath sanejament, s’executarà un hilat separatiu entà qu’es aigües pluviaus deth carrèr Quate Lòcs vagen directament entar arriu Garona, mentre qu’es aigües lordes anaràn ath hilat generau. D’aute biais, eth hilat d’aigua correnta s’actualizarà damb materiaus mès avienti entath sòn subministrament e s’installaràn claus de pas ar inici e ath finau dera actuacion. E, fin finau, i aurà ua milhora deth paviment. Per un costat, se reformaràn es trepadèrs de granit en mau estat, tanben se milhoraràn es güals entà coches e pedons, e s’i plaçarà paviment engondronat en acabat generau, en tot seguir era estetica d’acabats de Vielha.
“Damb aguesta actuacion modernizam eth servici d’aigua correnta e eth sanejament deth municipi, en tot adaptar-les as besonhs actuaus”, comente eth baile der Ajuntament de Vielha e Mijaran, Juan Antonio Serrano. E ahig que “damb eth compromís de contunhar milhorant es hilats d’aigües, auem encargat as servicis tecnics municipaus era redaccion d’un projècte que permeterà renauir pendent 2025 gran part deth hilat que demore obsolet e que compdarà damb un pressupòst de mès de 450.000€”.
25/10/2024