Notícies Veir istoric
Er equip de govèrn der Ajuntament de Vielha e Mijaran s’amasse damb es associacions deth municipi entà iniciar ua campanha d’ajuda as afectadi pera DANA dera Comunitat Valenciana
Er objectiu ei qu’autant er Ajuntament coma es associacions municipaus probotgen activitats entà requectar sòs en benefici des damnificadi pera DANA, en tot fomentar era mobilizacion ciutadana e associatiua
Er equip de govèrn der Ajuntament de Vielha e Mijaran, amassa damb eth conjunt d’associacions de Vielha e Mijaran, an iniciat ua campanha solidària entà ajudar as ciutadans dera Comunitat Valenciana afectadi pera DANA des darrèri dies.
En aguest sens, er objectiu ei poder establir un calendari d’activitats e accions a desvolopar pendent es pròplèu setmanes e mesi enes que se pogue requectar hons entà èster destinadi entàs damnificadi.
Des deth consistòri se destinarà ua gran part des sòs des activitats ja programades entàs pròplèu setmanes entà d’aguesta accion solidària, coma pòden èster, per exemple, era celebracion dera Hèsta dera Castanhada (suspenuda en sòn dia pes dies de dòl decretadi peth Govèrn Espanhòu) e que, fin finau, aurà lòc aguesta pròplèu dimenjada. Tanben s’arremassaràn sòs des entrades en Era Audiovisuau enes sessions de cinèma, atau coma des actuacions deth cicle de Teatre Familhar des pròplèu mesi.
D’aute biais, des der Ajuntament se preten fomentar era mobilizacion dera ciutadania e des associacions entà que poguen organizar, peth sòn compde, activitats enes que se poguen requectar sòs, coma pòden èster gales benefiques de dança, quintos solidaris, eca, enes qu’eth consistòri tanben collaborarà en tot cedir es equipaments publics. En aguest sens, ja s’a cedit un espaci deth Palai de Gèu entà ua accion d’arremassada de productes e materiaus solidaris, en ua prumèra iniciatiua gessuda des dera societat civiu.
“Vielha e Mijaran ei un municipi solidari. Des der Ajuntament de Vielha e Mijaran impulsaram un calendari d’accions benefiques, a on demoram era participacion de bona part des associacions entà poder requectar sòs entàs damnificadi pes episòdis dera DANA ena Comunitat Valenciana des darrèri dies”, comente eth baile der Ajuntament de Vielha e Mijaran, Juan Antonio Serrano. E ahig que “en nòsti municipi i a fòrça valencians que viuen e trabalhen des de hè fòrça ans, e volem demostrar-lis qu’èm damb eri en aguesti moments plan complicadi. Nosati patirem ues riuades importantes en 2013, e èm conscienti de çò que viuen e senten es familhes afectades, e mos solidarizam damb totes eres, e i dedicaram tot er esfòrç possible entà ajudar-les”.
05/11/2024