Notícies Veir istoric
Er Ajuntament de Vielha e Mijaran a començat es òbres de milhora deth hilat d’aigua correnta e d’aigües lordes en carrèr deth Miei d’Arròs
Era intervencion ei finançada ath 100% per Ajuntament de Vielha e Mijaran per valor de 31.552,72 €
Ja son en marcha es trabalhs de milhora des hilats municipaus en carrèr deth Miei d’Arròs, qu’amie a tèrme er Ajuntament de Vielha e Mijaran.
Aguesta intervencion compòrte er enderròc deth hilat de sanejament existent d’hormigon e se substituís per un hilat que separe es aigües pluviaus des lordes. Atau madeish, s’amie a tèrme era substitucion dera canalizacion der aigua de fibrociment que i auie per ua naua de polietilen, atau coma eth cambi des valvules existentes tà poder sectorizar eth hilat, e se uedarà eth hilat d’aigua connectada ath hilat de sanejament.
D’aute biais, se cambie era connexion deth hilat d’enlumenat entà hè’c sosterranh, en tot includir un cambi deth cablejat e era connexion aeriana, qu’ei sosterranha en inici deth carrèr.
Fin finau, se procedirà a adecuar er acabat deth paviment ara rèsta ja existent, damb empèires de granit centrat en carrèr damb formacion de gradons, mentre qu’era rèsta serà a base d’hormigon.
Eth 100% dera òbra ei finançada per Ajuntament de Vielha e Mijaran, coma actuacion qu’aufrís ena EMD d’Arròs e Vila. Atau madeish, se manten eth compromís der equip de govèrn de Vielha e Mijaran de seguir en tot milhorar eth sistèma d’aigües de toti es pòbles deth municipi, coma servici basic que prèste ara ciutadania.
Ei previst qu’eth conjunt dera intervencion sigue prèst en pòques setmanes, abantes dera arribada der iuèrn.
“Damb aguesta intervencion, des der Ajuntament de Vielha e Mijaran mantiem eth compromís de milhorar es servicis basics dera ciutadania, coma ei eth cas der aigua, que ja hè fòrça ans que realizam en toti es pòbles deth municipi, e qu’atau seguiram pendent aguesta legislatura”, comente eth baile der Ajuntament de Vielha e Mijaran, Juan Antonio Serrano.
07/11/2024