Notícies Veir istoric
Eth baile de Vielha e Mijaran, Juan Antonio Serrano, s’amasse damb representants des partits politics deth Parlament de Catalonha entà tractar era problematica der accès ar abitatge en Alt Pirineu e Aran
Enes desparières amassades, Serrano a podut trasladar era situacion grèu que viu eth Pirenèu, entre d’autes causes, pera nauta preséncia des pisi toristics qu’afècte a granes ciutats e tanben a zònes ruraus e de montanha
En tot profitar er inici d’ua naua legislatura ena Generalitat de Catalunya, eth baile der Ajuntament de Vielha e Mijaran, Juan Antonio Serrano, a realizat un seguit d’amassades damb representants des grops parlamentaris dera màger part dera cramba politica catalana entà tractar era grèu problematica que viu er Alt Pirineu e Aran en çò que tanh ar accès ar abitatge des joeni e trabalhadors abituaus. D’aguestes amassades sonque n’an demorat dehòra es grops parlamentaris de Junts per Catalunya e eth Partit Popular mès, en aguest darrèr cas, Serrano a podut mantier ua amassada damb eth baile popular de Badalona, Xavier Garcia Albiol. Aguesta ciutat deth Maresme regule es pisi toristics, coma tanben ac hè Vielha.
Enes diuèrses amassades, Serrano a volut transméter era nauta preocupacion que i a en territòri per accès ara viuenda, qu’enes darrèri ans a devengut un ahèr fonamentau, pr’amor dera grana dificultat qu’existís enes zònes de montanha entà trapar viuenda annau.
En aguest sens, Serrano destaque era importància de que se pogue mantier eth Decret Lei 3/2023, de mesures urgentes sus eth regim urbanistic des abitatges d’usatge toristic. Era problematica non sonque afècte as granes ciutats, senon que tanben ei fòrça evident enes zònes ruraus e poblacions petites.
Era proliferacion des pisi toristics ei ua des granes causes qu’a provocat era situacion que i a ara madeish en Pirenèu. Aguest tipe d’abitatge tanben afècte negativaments ath torisme de cases ruraus, en tant qu’era legislacion des abitatges d’usatge toristic ei molt mès permissiua qu’era de torisme rural, de manèra que provòque qu’aguesti negòcis se veiguen afectadi pera competéncia e empejore era qualitat deth servici en aguestes zònes.
“Era situacion que viuem en Pirenèu en accès ar abitatge ei fòrça grèu, pr’amor que fòrça joeni e familhes que trabalhen en territòri non trapen un lòc abituau a on poder víuer. Fòrça gent se ve obligada a marchar e d’auti non pòden vier a trabalhar pera manca de viuenda digna”, se planh eth baile de Vielha e Mijaran, Juan Antonio Serrano. E ahig que “gràcies ath Decret Lei 3/2023 podem auançar entà trapar solucions en aguest ahèr, en tot establir un equilibri entre eth torisme e eth dret ar abitatge. Volem que toti es partits politics catalans siguen conscienti de quina ei era situacion que viuem, e per aquerò auem volut transméter era nòsta preocupacion de prumèra man”.
08/11/2024