Notícies Veir istoric
Eth baile de Vielha e Mijaran, Juan Antonio Serrano, s’amasse damb eth sosdelegat deth Govèrn Espanhòu en Lhèida, José Crespin, entà demanar mès seguretat ena N-230
Aguesta via a un nivèu de perilhositat fòrça anaut e, per aguest motiu, Serrano demane que s’endurisque era proïbicion deth pas de camions de gran tonatge per aguesta via
Dempús deth darrèr accident de camion patit en Vielha ena jornada d’aguest passat dijaus, eth baile de Vielha e Mijaran, Juan Antonio Serrano, a profitat era escadença entà amassar-se damb eth sosdelegat deth Govèrn Espanhòu en Lhèida, José Crespin, entà demanar ara administracion espanhòla que i age ua màger seguretat ena via N-230.
Cada an, aguesta carretèra que vertèbre era provincia de Lhèida, des deth cap-lòc enquiara Val d’Aran, ei ua des vies que mès sinistres registre, sustot, pr’amor que circulen centeats de camions, en tot aumentar eth grad de perilhositat, en tot tier en compde tanben eth maumerenc estat en qué se trape en fòrça trams. De hèt, era N-230 compde damb diuèrsi punts neri de sinistralitat d’Espanha.
Era preséncia des camions genère grèus molésties ena vida vidanta ath long der an entàs vesins e vesies dera Val d’Aran. Per aguest motiu, Serrano a demanat era proïbicion dera circulacion des camions de gran tonatge, e tanben pr’amor que pendent fòrça epòques der an, es camions coincidissen ena carretèra damb fòrça veïculs.
Cau rebrembar qu’actuauments, ena Val d’Aran, ja i a ua limitacion des camions pendent es dimenjades dera sason d’iuèrn, precisaments entà evitar sinistres o accidents damb eth naut numèro de veïculs que transiten ena tempsada mès nauta de visitaires.
“Cada an era N-230 ei eth scenari de fòrça accidents e sinistres causadi per camions de gran tonatge, a conseqüéncia dera nauta preséncia d’aguest tipe de veïculs per aguesta via, somat as grèus deficiéncies qu’aguesta carretèra a. Ath delà, supause grèus molésties as vesins e vesies deth territòri. Per açò demanam era sua proïbicion, credem qu’era nauta perilhositat dera N-230 amendririe d’ua manèra subergessenta sense eth sòn transit”, comente eth baile de Vielha e Mijaran, Juan Antonio Serrano.
09/11/2024