Notícies Veir istoric
Er Ajuntament de Vielha e Mijaran trè a licitacion es òbres de reurbanizacion deth carrèr des Comets de Vielha, que serà transformat en ua naua plaça en 2025
Aguest nau espaci deth Solan a coma objectiu que sigue un punt de trobada e sociabilizacion des vesins, en tot bastir dues zònes de jòcs: un parc infantil e ua piramida de còrdes, un airau de descans damb ua pergola e un scenari fixe
Er Ajuntament de Vielha e Mijaran acabe de trèir a licitacion eth projècte de reurbanizacion deth carrèr des Comets de Vielha, plaçat en airau deth Solan, en tot reconvertir-lo en ua plaça en 2025.
En aguesta intervencion ei previst agranir aguest espaci en tot hèr-lo preferentament entà pedons. En aguest sens, s’i bastirà un parc infantil entara mainadèra, s’equiparà era plaça damb ua zòna d’ajardinament, ua pergola entà realizar espectacles en carrèr (hè ja fòrça ans qu’aguest emplaçament acuelh desparières activitats, per exemple, enes Hèstes de Vielha), e s’i plaçarà nau mobiliari urban (bancs de descans, paperères, jardinères, eca).
Atau madeish, eth consistòri preten amendrir er actuau predomini der espaci destinat as veïculs (sonque i aurie ua zòna de carga e descarga enes limits des des avengudes Maladeta e Garona), damb era milhora dera accessibilitat de persones damb mobilitat redusida, en tot eliminar desnivèus e milhorar era qualitat des acabats e deth mobiliari urban existenti.
Totes es empreses que siguen interessades en préner part d’aguesta licitacion an enquiath pròplèu 20 de noveme entà presentar es sues aufèrtes en Ajuntament de Vielha e Mijaran. Eth pressupòst ei de 329.398,48€.
Er objectiu principau de tot aguest projècte ei qu’aguesta naua plaça sigue un punt de trobada, de relacion e socializacion des vesins deth Solan de Vielha, pr’amor qu’en tot aguest endret non existís cap tipe de plaça.
Eth Solan de Vielha ei un barri damb fòrça vida, a on destaque un ample complèxe d’installacions esportiues municipaus, coma son eth Palai de Gèu, eth Palai d’Espòrts, era pista de frontennis e eth nau skatepark. Atau madeish, tanben compde damb un passèig fluviau ath cant dera Garona recentament reformat e milhorat peth consistòri, que permet poder passejar e hèr-i exercici. Ath delà, aguest parçan de Vielha destaque per èster un espaci assolelhat pendent bona part der an. Atau madeish, tanben se trape fòrça apròp deth parcatge public des antigues casèrnes militares, entà poder deishar eth veïcul e accedir-i a pè.
“Eth bastiment d’aguesta naua plaça en Solan de Vielha ei ua accion entà qu’es vesins e vesies d’aguest parçan agen un punt de trobada, de relacion e sociabilizacion, pr’amor qu’ara madeish non i a cap espaci d’aguest tipe en tot aguest endret”, comente eth baile de Vielha e Mijaran, Juan Antonio Serrano. E ahig que “tanben ei ua grana oportunitat economica entà que poguen proliferar naui negòcis, en tot balhar un nau impuls en un parçan qu’ei ben connectat damb eth centre dera poblacion”.
11/11/2024