Notícies Veir istoric
Eth plen der Ajuntament de Vielha e Mijaran apròve eth pressupòst municipau de 2025 per valor de 8.642.164,18€, eth mès naut dera sua istòria
Se produsís un aument deth 6,24% en relacion as compdes de 2024, en çò que supause 508.333,67€ mès, gràcies a que se genère ua màger quantitat d’ingrèssi
Aguest dimèrcles, eth plen der Ajuntament de Vielha e Mijaran ven d’aprovar eth pressupòst municipau der an 2025 per un impòrt de 8.642.164,18€. Un pressupòst que supause un 6,24% mès anaut qu’enes compdes de 2024.
Aguest aument se produsís a arraïtz d’ua màger quantitat d’ingrèssi. D’aguesta manèra, s’a dotat eth capitol 1 (personau) damb totes es places estructuraus a corbir segontes establís era Relacion de Lòcs de Trabalh aprobada, atau coma s’a incorporat toti es temporaus que permeteràn auançar enes contractacions e planificar es trabalhs de 2025.
D’aute biais, eth consistòri manten era aportacion as Entitats Municipaus Descentralizades, que ja siguec aumentada en pressupòst de 2024, e que permet auer mès autonomia e autogestion des diuèrsi pòbles. En aguest sens, se manten era partida de 231.157,27€.
Aguest pressupòst a compdat damb es vòts a favor deth govèrn d’Unitat d’Aran, mentre qu’era oposicion de Convergéncia Aranesa s’a abstengut e Aran-Amassa a votat en contra.
“Eth pressupòst der Ajuntament de Vielha e Mijaran de 2025 ei eth mès naut dera sua istòria en tot assolidar un pressupòst basat ena eficiéncia e era eficàcia dera gestion municipau. Mos permet corbir totes es despenes en servicis e subministraments der ajuntament, que cada an aumenten en tot adaptar-se as besonhs d’un municipi gran” comente eth baile de Vielha e Mijaran, Juan Antonio Serrano. E ahig que “er objectiu ei qu’aguest ajuntament sigue ua administracion ben gestionada e solventa, e que se regís per equilibri pressupostari”.
20/11/2024