Notícies Veir istoric
Er Ajuntament de Vielha e Mijaran trè a licitacion es òbres d’urbanizacion e adeqüacion des carrèrs Clòses e Montanero de Vielha
S’amiaràn a tèrme milhores en desparièrs trams de paviment que se trapen en un estat maumerenc, se cambiaràn es acabats de diuèrsi espacis publics, e se dessenharà un nau traçat entà minimizar er impacte des veïculs grani
Er Ajuntament de Vielha e Mijaran acabe de trèir a licitacion era execucion des òbres d’urbanizacion e adeqüacion des carrèrs Clòses e Montanero de Vielha.
Aguesta actuacion, qu’ei previst desvolopar-la ena pròplèu primauera, supausarà ua milhora completa d’aguesti carrèrs, enes que s’i amiarà a tèrme ua reforma de diuèrsi trams de paviment que compden damb desparièrs materiaus e que se trapen en un estat maumerenc, atau coma d’auti que non dispausen de paviment o son de tèrra compactada.
Atau madeish, s’actuarà en diuèrsi espacis publics entà poder milhorar-ne er aspècte generau e cambiar es materiaus d’acabat per uns que requerissen mens manteniment. D’aute biais, calerà dessenhar un traçat nau entàs carrèrs entà poder minimizar er impacte que genèren es veïculs mès grani enes façades des bastisses.
Ath hons deth carrèr Clòses se realizarà era milhora dera zòna de parcatge damb era formacion d’ua petita plaça damb bòrd e gual de granit, pavimentada damb empèires de mortèr de color nere.
Aguesta intervencion s’includís laguens deth plan d’urbanizacion e adeqüacion qu’eth consistòri inicièc en 2022 enes que s’includien era Avenguda Castièro, era Avenguda dera Tuca, es carrèrs Clòses, Quate Lòcs, Pomaròla, Anglada e camin de Casau.
Era licitacion compde damb un pressupòst de 38.416,62 €, e s’executarà en un tèrme de 2 mesi e miei en 2025. Es empreses interessades pòden presentar es sues aufèrtes ena sedença electronica der Ajuntament de Vielha e Mijaran enquiath pròplèu 3 de deseme.
“Damb aguest projècte d’urbanizacion e adeqüacion des trepadèrs e paviment des carrèrs Clòses e Montanero, seguim damb era melhora d’aguesti espacis publics, en tot favorir ua melhora accessibilitat e circulacion entàs pedons”, comente eth baile de Vielha e Mijaran, Juan Antonio Serrano. E ahig que “er ambiciós projècte que inicièrem en 2022 a supausat ua milhora considerabla dera imatge e foncionalitat de diuèrsi carrèrs de Vielha des d’alavetz, e seguim damb era sua execucion entà qu’aguesta milhora sigue mès efectiua”.
28/11/2024