Notícies Veir istoric
Er Ajuntament de Vielha e Mijaran trè a licitacion era 2au fasa d’adecuacion e milhora deth pati dera Escòla Garona
S’i installarà naui paviments de hormigon e sablon, damb eth montatge de naui andasi de separacion damb er exterior e compdarà damb ua zòna de jòc dessenhada entà fomentar era activitat fisica e era creativitat der alumnat
Er Ajuntament de Vielha e Mijaran ven de trèir a licitacion era 2au fasa d’adecuacion e milhora deth pati dera Escòla Garona. Un projècte que supausarà ua milhora considerabla der espaci qu’aurà er alumnat d’aguest centre.
En aguest endret ei prevista era installacion de naui paviments de hormigon e sablon, a on tanben i aurà andasi de separacion damb er exterior e s’i bastirà ua zòna de jòc dessenhada entà fomentar era activitat fisica e era creativitat der alumnat.
D’aute biais, aguest espaci gaudirà d’arbes frutèrs que non sonque milhoraràn era berèsa der endret, senon que s’emplegue coma airina educativa sus era sostenibilitat e eth suenh deth medi ambient. Atau madeish, s’i plaçarà ua hònt d’aigua potabla entà facilitar er accès ara idratacion, en tot promòir abituds de vida saludables en alumnat. Eth conjunt de tot aguest nau endret compde damb ua superfícia de 705,56m2.
Era licitacion compde damb un pressupòst de 44.261,84€ (IVA includit).
Aguest projècte reafirme eth compromís der equip de govèrn de seguir damb es prètzhèts de manteniment e milhora deth conjunt des installacions dera Escòla Garona. En aguest sens, en 2023 ja se realizèc era prumèra milhora deth pati deth centre damb era milhora deth paviment e des barraments perimetraus deth pati, atau coma eth bastiment d’un camp de fotbòl 7 e eth marcatge d’ua pista de basquet, damb un projècte avalorat en 195.190,38€.
En 2023 tanben s’amièren a tèrme trabalhs de mantenement e seguretat en pati infantil: supression d’un desnivèu en un barrament, repintat d’un espaci entà crear una pissarra, remodelacion der espaci de sable entà jogar e era milhora deth sistèma de canaus d’aigua. Tanben se subministrèc eth pati damb naui jòcs infantils: dues codines de husta e un rocòdrom. Eth conjunt des actuacions compdèc damb un pressupòst de 15.810,44 €.
D’aute biais, en 2021 tanben s’actuèc en pati dera Escòla Mairau “Era Cunhèra”, damb òbres de reabilitacion. En aguest cas, se realizèc era substitucion der antic solèr de losetes de goma, que se trapaue en un estat maumerenc a conseqüéncia dera climatologia e deth sòn emplec, per un nau paviment amortigüat continu de mès durabilitat e damb un dessenh infantil. Ua actuacion pressupostada en 19.000 €.
“Des der equip de govèrn de Vielha e Mijaran estant auem clara era importància de seguir en tot dignificar es espacis educatius entà qu’era nòsta mainadèra gaudisque d’ues installacions de qualitat. Toti es patis des centres educatius municipaus (Escòla Mairau e Escòla Garona) an estat renauidi totaument enes darrèri 4 ans”, comente eth 2au tinent d’alcalde e còsso d’ensenhament de Vielha e Mijaran, Alberto López.
18/02/2025