Notícies Veir istoric
Eth milhor cinèma de montanha deth mon torne tà Vielha es dies 6 e 7 de març damb era 7au edicion deth hestau Mendi Tour
Eth cap-lòc aranés organize aguest eveniment a on se projectaràn cinc des milhors films de cinèma de montanha dera darrèra edicion deth BBK Mendi Film Bilbao-Bizkaia
Es pròplèu 6 e 7 de març, Vielha tornarà a celebrar ua naua edicion deth hestau de cinèma de montanha Mendi Tour Vielha.
Pendent aguesta 7au edicion d’aguestes jornades se projectaràn un totau de cinc pellicules. Dijaus 6 de març, a compdar des 19:00, se començarà damb “Jamie” (Milhor Cuertmetratge Mendi Film 2024), dirigida per Darcy Hennessey. Un film transgenre damb era figura de Jamie Logan, que siguec un aupinista damb succès enes ans 70, qu’ara, damb 60 ans, se reivindique coma hemna e ei acompanhada ena sua transformacion pera sua hemna. Eth 2au film se titole “Always alive” (Seccion Oficiau Mendi Film 2024), dirigit per Davina Montaz-Rosset, a on era trail runner Hillary Gerardi a eth rèpte d’arténher eth recòrd Chamonix-Mont Blanc-Chamonix. Un rèpte damb esperit aupin e en tot generar conscienciacion sus er amendriment des glacièrs enes Aups. Era 3au projeccion ei “Of A Lifetime” (Milhor Fotografia Mendi Film 2024), de Jérome Tanon. Un film d’esquí extrèm damb Xavier e Victor de le Rue amassa damb era hilha deth prumèr. Era aventura familhara succedís entre espectaculari glacièrs e icebergs ena Antartida.
Dissabte 7 de març, se projectaràn dus films mès a compdar des 19:00. Era prumèra filmacion ei “Andrea: an unpaved route” (Milhor Pellicula d’Espòrt e Aventura Mendi Film 2024), de Maxime Mouline. Protagonizada pera famosa escaladora Nina Caprez, era sua parelha, eth fotograf Jeremy Bernard e era hilha d’ambdús en un viatge en camper a trauès de Marròc. E eth hestau finalizarà damb “Painting the Mountains” (Seccion Oficiau Mendi Festival 2024), de Pierre Cadot. Un extraordinari play-ground d’esquí ena Patagònia. Ua activitat de maximala tension e risc en emblematic massís Fitz Roy, damb un grop d’esquiaires capables d’imaginar çò qu’ei inimaginable enes verticaus linhes de nhèu que passen pes agulhes de granit patagonic.
Enguan, ath delà, cau soslinhar qu’eth Mendi Tour s’includís laguens deth hestau Ternua Experience damb desparières activitats restacades damb era montanha que se desvoloparàn autant en Centre Polivalent de Vielha coma ar aire liure deth 6 ath 9 de març.
Era entrada as jornades an un prètz de 10€ per dia e se poiràn crompar ena sedença deth consistòri en orari abituau, de deluns a diuendres, des 08:00 as 14:00.
“Eth hestau Mendi Tour Vielha ei ua apòsta que des der Ajuntament de Vielha e Mijaran volem mantier pr’amor que supause un element mès qu’ajude ath nòste municipi a assolidar-mos coma destinacion de referéncia de nauta montanha enes Pirenèus”, comente eth baile de Vielha e Mijaran, Juan Antonio Serrano.
Pera sua part, era mairia deth hestau, era aupinista Edurne Pasaban, afirme qu’”ei un aunor poder tornar a celebrar ua naua edicion d’aguest eveniment, en quau auram films de fòrça qualitat, damb desparièrs espòrts d’aventura, en tot hèr un torn per diuèrsi espòrts d’iuèrn”.
Ath delà, eth prumèr dia deth hestau, ath maitin, er alumnat der Institut d’Aran poirà veir diuèrsi films en un passi privat en Era Audiovisuau. “Volem apropar eth cinèma de montanha as joeni, que son eth futur, e per açò, enguan, tornam a aufrir-les era visualizacion de diuèrsi films deth hestau”, comente eth còsso de joenessa e d’espòrts, David Moreno.
25/02/2025