Notícies Veir istoric
Eth Palai de Gèu de Vielha enregistre chifres recòrd d’abonats e usatgèrs
Actuauments, ath torn de 1700 persones empleguen es desparièrs servicis qu’aufrís eth principau equipament esportiu dera Val d’Aran
Eth Palai de Gèu de Vielha viu un des sòns milhors moments des 30 ans de vida en çò que tanh ath numèro d’abonats e usatgèrs qu’empleguen abituauments es installacions deth principau equipament esportiu de Vielha e Mijaran e que balhe servici a tota era Val d’Aran.
Actuauments, eth Palai de Gèu compde damb 1182 abonats e 518 usatgèrs qu’empleguen desparièrs espacis e servicis, çò que supause qu’ath torn de 1700 persones son usatgères abituaus. Totes aguestes donades hège fòrça ans que non s’artenhien e que mòstre eth bon camin que seguís eth Palai de Gèu aué dia.
De hèt, enes darrèri 3 ans, son fòrça es entitats, associacions, esportistes de naut rendiment e tecnificacion qu’empleguen es installacions deth Palai de Gèu entàs sòns entrenaments fisics.
Ath delà, eth Palai seguís en tot organizar competicions e stages de patinatge artistic sus gèu e natacion, damb preséncia de gent arribada de fòrça endrets d’Espanha e, includit, der estrangèr.
Eth Palai de Gèu ei un equipament municipau que balhe servici a totes es edats, en tot promòir era salut, benéster, espòrt e cultura. Un servici que lèu se pòt gaudir pendent tot er an e dubèrt a tota era gent dera Val d’Aran e visitaires que recep eth territòri. Ei un des equipaments estrategics entath desvolopament e creishement deth municipi de Vielha e Mijaran, precisament, pr’amor qu’aglutine tota era aufèrta ludica deth municipi.
D’aute biais, cau auer en compde que se tracte d’ua installacion envielhida peth pas deth temps. Siguec inaugurada en 1994 e, 30 ans dempús, genère fòrça problèmes estructuraus que s’an de solventar. Eth hèt de que i age es piscines interiores ena prumèra planta, en tot produsir calor, e ath cant era pista de gèu en tot produsir heired, a accelerat aguest envielhiment e i cau implementar mesures entà poder garantir eth sòn futur.
En aguest sens, er equip de govèrn a iniciat ua fasa de redaccion de diuèrsi projèctes destinadi a milhorar er estat dera installacion ena prumèra planta, en tot pensar en futurs projèctes qu’ajuden a mantier en pè eth Palai de Gèu enes condicions avientes entàs futures generacions d’usatgèrs e qu’aurà de besonh de granes inversions publiques.
“Eth Palai de Gèu ei un pilar fonamentau der espòrt e dera societat en generau en Vielha e Mijaran e deth conjunt dera Val d’Aran. Ei er unic equipament a on s’i pòt nadar pendent lèu tot er an, e ua des pòques installacions de tota Espanha qu’encara manten era pista de gèu entà poder-i practicar desparières disciplines esportiues. Per aquerò èm consciènti e comprometudi en voler milhorar eth sòn estat”, comente eth baile de Vielha e Mijaran, Juan Antonio Serrano. E ahig que “sabem que i cau hèr fòrça reformes e milhores entà poder deishar-lo enes milhores condicions possibles mès, entà poder artenhè’c, cau qu’es institucions publiques e esportiues s’impliquen se volem garantir era sua viabilitat entàs pròplèu generacions. Era inversion serà plan importanta e er Ajuntament de Vielha e Mijaran non poderà assomir tota era despena, pr’amor que condicione considerablament es pressupòsti publics municipaus. Compdam damb ajudes deth Conselh Generau d’Aran e dera Deputacion de Lhèida, que permeten paliar eth deficit economic que se genère cada an, mès ei indispensable ua bona injeccion de sòs entà trabalhar en projècte de modernizacion der equipament municipau”.
28/02/2025