Notícies Veir istoric
Vielha e Mijaran receberà 3.193.132,23€ deth PUOSC 2025-2029 dera Generalitat de Catalunya
Aguesta quantitat se distribuís en 568.132,23€ entar Ajuntament de Vielha e Mijaran e 2.625.000€ entà totes es EMD e serà destinat a inversions entara milhora des infrastructures e servicis municipaus
Eth municipi de Vielha e Mijaran receberà 3.193.132,23€ deth PUOSC (Pla Únic d’Obres i Servei) 2025-29 dera Generalitat de Catalunya. Aguesta quantitat se distribuís en 568.132,23€ entar Ajuntament de Vielha e Mijaran e 2.625.000€ entà totes es EMD. Ua chifra fòrça mès anauta qu’en anterior PUOSC en periòde 2020-24, que siguec de 841.685,52€.
Aguesta linha de subvencions permeterà destinar aguesta quantitat de sòs entà poder amiar a tèrme grani projèctes qu’es EMD agen entà milhorar es pòbles, ja siguen carrèrs, equipaments e/o servicis basics.
Cada EMD aurà d’escuélher entre 1 e 5 projèctes coma maximal a desvolopar en periòde 2025-29 en tot recéber ua subvencion deth 95% des projèctes, mentre que a Vielha li subvencionaràn eth 75% de cada projècte.
Des der equip de govèrn de Vielha e Mijaran estant s’an establit amassades damb es representants de totes es EMD entà conéisher quini son es besonhs e prioritats, de manèra que se pòden méter dessús dera taula es projèctes a desvolopar e veir quini son mès factibles de que poguen èster subvencionadi peth PUOSC.
Ath delà, des der Ajuntament de Vielha e Mijaran s’estúdie incrementar era aportacion as EMD entà poder finançar part d’aguesti projèctes que se vòlen amiar a tèrme. Aguesta mesura seguís eth compromís aquerit en 2024 peth consistòri damb cadun des pòbles, en tot auer-lis duplicat eth pressupòst que receben entà qu’agen mès autonomia ena gestion des sues competéncies pròpries.
“Des der Ajuntament de Vielha e Mijaran mantiem eth nòste compromís de collaborar damb es EMD en tot çò qu’agen de besonh. Enes darrères setmanes auem mantengut diuèrses amassades damb totes es EMD deth municipi entà concretar e veir coma hèr realitat es principaus accions a desvolopar en cadun des pòbles”, comente eth baile de Vielha e Mijaran, Juan Antonio Serrano. E ahig que “des der equip de govèrn de Vielha e Mijaran seguim en tot contribuïr economicament damb aqueri projèctes qu’es EMD volguen amiar a tèrme, qu’en diuèrsi casi supause que des deth consistòri duplicam era aportacion as pòbles. Tot açò en benefici de toti es vesins de Vielha e Mijaran, en tot cercar arténher eth maximal benèster possible. Tà nosati ei fonamentau seguir en tot ajudar damb es besonhs e prioritats des pòbles e atau contunharam en tot auer ua relacion pròplèu entre es administracions”.
11/03/2025