Notícies Veir istoric
Er Ajuntament de Vielha e Mijaran aquerís nau materiau esportiu que permet milhorar diuèrsi equipaments deth Palai de Gèu
Per un costat, s’a aquerit ua vintia de maquines e elements que milhoraràn era sala fitness e, per un aute costat, s’a crompat 57 parelhs de patins de loguèr entara pista de gèu
Er Ajuntament de Vielha e Mijaran seguís damb eth compromís de milhorar es servicis qu’aufrís eth Palai de Gèu as sòns usatgèrs. En aguest sens, acabe d’aquerir nau materiau que supausarà ua milhora considerabla de diuèrsi espacis d’aguesta installacion esportiua municipau.
Pendent es darrèri ans, er aument important d’usatgèrs que recep eth Palai, obligue a auer eth materiau enes condicions avientes e damb era quantitat que merite eth corrècte foncionament des espacis. D’aciu eth besonh d’aquerir aguest nau materiau.
Eth materiau aquerit cònste de dues vessants: Per un costat, un lòt d’aquesiment de maquinària e equipament esportiu de musculacion dera sala fitness. En aguest espaci, qu’ei equipat damb maquinària d’exercitacion càrdio-paumonar e maquinària de musculacion e pes liure, i auie eth besonh de realizar era substitucion e aumentacion dera quantitat d’equipament esportiu que s’aufrís as usatgèrs. En totau 17 maquines e elements naui que serviràn entà balhar responsa ara nauta quantitat d’usatgèrs dera sala, atau coma substituir eth materiau obsolet.
Er aute materiau ei dirigit as usatgèrs dera pista de gèu. Concretaments, s’a crompat 57 naui parelhs de patins de loguèr, autant entara mainadèra coma entara gent grana, de manèra que se milhorarà eth servici que s’aufrís.
Eth prumèr lòt (sala fitness) a compdat damb un pressupòst de 12.466,65€, mentre qu’eth dusau (pista de gèu), auie un pressupòst de 5.036,50€.
Des der equip de govèrn, son ja fòrça es intervencions que s’an hèt autant ena sala fitness, damb renauïment de materiau, coma ena pista de gèu, e en conjunt des espacis qu’englòben eth Palai de Gèu, en tot aufrir ua màger qualitat dera principau installacion esportiua de Vielha e Mijaran, e deth conjunt dera Val d’Aran.
En 2022, eth consistòri substituïc era vielha maquinària e aparelhs de musculacion deth gimnàs per uns mès modèrni. Concretament sigueren: 11 maquines de musculacion, 4 bancs, 8 barres olimpiques, 54 discs olimpics, 1 supòrt entàs barres olimpiques e 4 supòrts entàs discs olimpics.
18/03/2025