Notícies Veir istoric
Er Ajuntament de Vielha e Mijaran milhorarà eth servici d’aigua potabla en Camin de Casau e era Carretèra de Gausac
D’aguesta manèra se renauiràn 360 mètres dera canerada deth hilat d’aigües, en tot milhorar era qualitat deth servici
Der Ajuntament de Vielha e Mijaran estant se trabalhe entà seguir en tot milhorar er estat deth servici deth subministrament der aigua potabla en municipi. En aguest sens, ara se trabalhe ena redaccion deth projècte entà substituïr 360 mètres de canerada: 130 mètres ena Carretèra de Gausac e 230 mètres en Camin de Casau. Atau madeish, tanben se procedirà ar engondronat des dus carrèrs de manèra complèta e, en Camin de Casau, ath delà, se milhorarà es passi de pedons, en tot hèr-lo mès segur autant entara gent que passège coma entàs veïculs que i transiten abituauments.
Damb aguesta intervencion s’artenherà un bon auanç ena modernizacion deth hilat d’aigües en pòble de Vielha, ena que sonque mancarà per actuar ena Avd. Pas d’Arró e Avd. Calbetó Barra e en petites vies de carrèrs.
Aguesta futura òbra compde damb ua subvencion deth Pla de Cooperació Municipal per al finançament d’inversions en matèria de Salut dera Diputacion de Lhèida 2023-25 pera quantitat totau de 390.868€.
Er Ajuntament de Vielha e Mijaran a era milhora deth servici deth subministrament der aigua correnta e es depòsits municipaus coma compromís fonamentau dera accion de govèrn pendent hè fòrça ans. S’a realizat aguesta milhora generau autant en Vielha coma ena rèsta des pòbles deth municipi.
“Des der equip de govèrn de Vielha e Mijaran mantiem eth compromís iniciat hè fòrça ans damb era milhora deth servici de subministrament der aigua correnta entàs viuendes deth nòste municipi. Enes darrèri 10 ans auem realizat ua milhora plan considerabla ena màger part d’aguest servici en toti es pòbles, en tot modernizar-la e adaptar-la as besonhs actuaus”, comente eth baile de Vielha e Mijaran, Juan Antonio Serrano.
20/03/2025