Notícies Veir istoric
Eth plen der Ajuntament de Vielha e Mijaran apròve era 2au modificacion de credit deth pressupòst municipau de 2025 per valor de 5.335.215,12€
Aguesta modificacion s’a aprovat damb es vòts a favor deth govèrn municipau d’Unitat d’Aran, mentre que Convergéncia Aranesa s’a abstengut e Aran-Amassa a votat en contra
Eth plen der Ajuntament de Vielha e Mijaran, amassat en session ordinària, ven d’aprovar aguest maitin era 2au modificacion de credit deth pressupòst municipau d’enguan per valor de 5.335.215,12€. Eth romanent de tresaureria finançarà 4.095.759,90€ des despenes dera modificacion de credit, mentre que s’artenh desparières subvencions dera Deputacion de Lhèida e dera Generalitat de Catalunya per un impòrt totau de 1.110.476,30€.
Gràcies ad aguesta modificacion eth consistòri poderà amiar a tèrme desparières intervencions de milhora des servicis basics en conjunt deth municipi, enes següents encastres: En vies publiques s’i destinarà 1.221.517,64€ (a on destaquen 933.000€ entà amiar a tèrme era milhora de diuèrsi carrèrs de Vielha), en subministrament e depòsit d’aigües 555.000€ (a on s’includís era milhora deth servici d’aigües en Camin de Casau e Carretèra de Gausac per valor de 400.000€), en enlumenat public 1.240.697,48€, en equipaments 1.215.000€ (a on lèu toti es sòs anaràn ara reforma dera Oficina Tecnica) e en Palai de Gèu 400.000€.
Atau madeish, eth plen tanben a aprovat era modificacion deth reglament intèrn dera Escòla Mairau “Era Cunhèra” de Vielha. Ua airina damb era que se regule eth foncionament ordinari d’aguest equipament municipau.
“D’ençà der equip de govèrn municipau lamentam que des dera oposicion, Convergéncia Aranesa, qu’a estat un partit qu’a governat en quauqui viatges aguest consistòri en passat e, Aran-Amassa, non agen votat a favor d’ua modificacion de credit plan anauta coma era qu’auem aprovat e que supausarà ua grana escadença entà amiar a tèrme ua fòrta inversion en desparièrs airaus que garantiràn ua milhora des servicis basics e der estat des vies publiques deth conjunt deth municipi”, comente eth baile der Ajuntament de Vielha e Mijaran, Juan Antonio Serrano. E ahig que “serie fondamentau qu’auessen mès vision de municipi, e non sonque votar negativaments a prepauses que supausen ua milhora deth benéster de toti, e que deishèssen de pensar sonque en clau de partit”.
26/03/2025