Notícies Veir istoric
Vielha e Mijaran inície era implementacion deth Programa municipau de Gestion de Colònies Felines
Er Ajuntament a realizat era prumèra campanha intensiva CER (Captura, Esterilizacion e Retorn), en tot auer actuat damb lèu 80 gats en Vielha
Er Ajuntament de Vielha e Mijaran acabe de méter en marcha eth Programa municipau de Gestion de Colònies Felines damb era execucion dera prumèra campanha intensiva CER (Captura, Esterilizacion e Retorn), en tot auer actuat damb lèu 80 gats en Vielha.
Concretament, s’a trabalhat sus 79 gats (35 femelhes e 44 mascles), damb un totau de 77 chips, damb 79 desparasitacions. Atau madeish, s’an realizat 14 vacunes. D’aute biais, cau remercar qu’en ua des captures s’auec de hèr ua enucleacion, en tot pérder un uelh un des gats, e tanben s’actuèc sus 3 gatets, 2 damb problèmes de vista grèus e 1 qu’aue eth pòt trincat.
Aguesta actuacion a compdat damb un pressupòst maximal de 14.520€ (IVA includit).
Eth cens municipau actualizat en mai de 2026 a identificat 42 colònies o emplaçaments en 14 nuclèus de poblacion, damb apuprètz 700 animaus.
Er Ajuntament realize esterilizacions de gats comunitaris d’ençà der an 2016, generaument entre 10 e 20 animaus ar an. Aguestes accions e era dedicacion des persones qu’an suenhat es colònies an estat fonamentaus, mès era dimension artenhuda, era dispersion territoriau e era manca de recorsi sufisents non an permetut estabilizar globaument era poblacion felina.
“Volem bastir ua gestion des colònies felines damb mès recorsi, coordinacion e contunhitat municipau. Era esterilizacion des gats non ei sonque ua recomanacion veterinaria: ei un estrument clau entà milhorar era salut des animaus, previer er abandon e assegurar ua convivéncia equilibrada en nòste entorn urban e naturau”, soslinhe eth baile de Vielha e Mijaran, Juan Antonio Serrano.
Eth Programa CER regule eth registre e cens des colònies, es captures, era esterilizacion, era identificacion mejançant microchip municipau, era atencion veterinària, eth retorn e eth seguiment des animaus. Tanben establís es foncions des desparièrs servicis municipaus e eth marc de collaboracion damb es persones que participen en suenh des colònies.
Damb aguest procès, Vielha e Mijaran auance cap a ua gestion establa, damb critèris tecnics e veterinaris, recorsi municipaus e collaboracion ciutadana organizada, que permete milhorar eth benèstar des animaus e era convivéncia en toti es pòbles deth municipi.
De cara ath prumèr semestre de 2027, eth consistòri implementarà ua naua campanha intensiva CER entà poder esterilizar fòrça mès gats, en tot evitar, atau, possibles embarassi ena pròplèu primauera.
13/11/2026