Notícies Veir istoric
Er Ajuntament de Vielha Mijaran s’interèsse pera situacion dera facturacion dera lum en municipi
Dempús d’auer constatat qu’era empresa suministradora non a emetut cap factura dera lum d’uns mesi ençà, er alcalde de Vielha Mijaran a contactat damb es sòns responsables entà conéisher er estat dera situacion.
Juan Antonio Serrano, alcalde de Vielha Mijaran, s’a metut en contacte damb es responsables d’Endesa entà conéisher es motius pes qu’aguesta empresa a deishat de facturar as vesins dera Val d’Aran es darrèri mesi.
Segontes era pròpria empresa, er 1 de gèr de 2015 entrèc en vigor ua naua normativa estatau qu’afècte a toti es clients qu’an concessions, entre es quaus s’inclodissen es residents dera Val d’Aran.
Atau donques, e tostemp segontes era informacion balhada per Endesa, aguesta companhia ellabòre ara eth procediment mès avient entà dar forma as naues factures, que segontes an manifestat, seran factures que se fraccionaràn degudament entà facilitar-ne eth sòn pagament e era sua regularización, en tot aufrir as clients ues condicions de pagament damb eth madeish termini qu’era empresa Endesa a demorat en enviar-les era factura.
En paraules der alcalde de Vielha Mijaran “des der Ajuntament auem remassat era preocupacion qu’es vesins mos an anat trasladant, e tot e que se tracte d’ua relacion exclusivament dera empresa damb es sòns clients, auem demanat a Endesa que solucione aguest ahèr damb era màger brevetat possible e de manèra que resulte çò mens perjudiciau entàs usatgèrs aranesi”.
27/08/2015