Notícies Veir istoric
Juan Antonio Serrano amasse as alcaldes aranesi entà tractar era problematica deth servici de Telefónica Movistar en Aran
Alcaldes dera Val d’Aran an acordat eméter ua declaracion conjunta entà manifestar eth descontent e malestar peth deficient servici qu’aguesta companhia aufrís en territòri
Aguest maitin s’a celebrat en Ajuntament de Vielha Mijaran ua amassada d’alcaldes aranesi entà tractar sus es contunhs talhs en suministre de telefonia e es nombroses panes ena cobertura que se succedíssen en Aran.
Pendent era trobada s’a acordat era signatura d’ua declaracion conjunta ena qué tà méter de manifèst eth gran descontent respècte deth servici que Telefónica Movistar balhe enes municipis aranesi. Aguesta declaracion se harà a arribar tanben as municipis der Alt Pirineu e Aran entà que se higen ara exigéncia inmediata de melhora qu’es installacions de telefonia an de besonh.
Ad aguesta amassada, tara qu’er alcalde de Vielha Mijaran a convocat a toti es alcaldes des municipis dera Val d’Aran, i an assistit per part der Ajuntament de Vielha Mijaran Juan Antonio Serrano, alcalde, e Maria Vergés, dusau tinent d’alcalde, atau coma es alcaldes de Les, Emilio Medan, e de Bossòst, Amador Marqués, en tot qu’era rèsta n’an excusat era preséncia. Totun, ja an manifestat era sua intencion d’addesion, ath delà des nomentadi, es municipis de Bausen e Canejan.
Atau madeish, aguesta declaracion se remeterà tanben as entitats economiques deth territòri tà que, coma sector afectat pes talhs en servici, poguen higer-se ara demana, e un viatge totes es addesions siguen confirmades, se remeterà eth document ara pròpria empresa Telefónica Movistar, ara Secretaria d’Estat de Telecomunicacions e ath Departament d’Empresa e Ocupacion dera Generalitat de Catalunya.
En paraules der alcalde Serrano “era accion conjunta de toti es municipis aranesi e des estaments economics d’Aran mos da fòrça deuant de Movistar entà qu’escoten es demanes de melhora deth sòn servici, qu’actuaument se mòstre totaument ineficaç”.
31/08/2015