Notícies Veir istoric
Er Ajuntament de Vielha Mijaran modifique eth sòn pressupòst entà atier es prioritats deth municipi
Eth plen der Ajuntament a aprovat, damb eth vòt en contra de CDA e eth vòt favorable d’UA e C’s, era modificacion deth pressupòst tà dar cobertura as objectius e critèris deth nau govèrn deth consistòri
Aguest maitin s’a amiat a tèrme eth plen extraordinari der Ajuntament de Vielha Mijaran en qué s’a aprovat era qu’ei era tresau modificacion de crèdit d’aguest consistòri e era prumèra deth nau govèrn entestat per Juan Antonio Serrano. Era modificacion s’a realizat entà adaptar es objectius e prioritats qu’er actuau Ajuntament a respècte deth municipi, entre d’auti, era creacion d’emplec e era melhora e adequacion de carrèrs e infraestructures municipaus. Aguesti cambis en pressupòst provien en grana mesura dera adequacion de partides non aprofitades enquiath moment e de d’autes que s’an eliminat entad aguest prètzhèt. Atau donc, era modificacion de crèdit a estat de 406.388’63€, des quaus 111.779 € provien de romanent de tresoreria e era rèsta sorgíssen de baishes de crèdit de partides de despenes preexitentes, es quaus non perjudiquen eth foncionament normau des servicis. Coma punts mès destacadi dera modificacion, er alcalde de Vielha Mijaran, Juan Antonio Serrano, destacaue que: “es prioritats der Ajuntament en aguesti moments son es que faciliten e melhoren era qualitat de vida des nòsti vesins”. En aguest sens er alcalde a manifestat que damb aguesti cambis en pressupòst “auem generat ua partida de 60.000€ entara creacion de diuèrsi plans ocupacionaus que genèren lòcs de trabalh entad aguesti mesi de tardor a on er emplec disminuís, e ath madeish temps auem volut priorizar òbres coma era dera sala polivalenta de Vielha que se trape en un estat plan deficient o er apraiament de carrèrs”. Tanben a hijut que: “er Ajuntament mantierà es accions de caractèr mès institucionau e de país, mès en tot cas, era nòsta prioritat ei era de dar respòsta as besonhs inmediats des nòsti vesins, sense qu’auerò implique barrar era pòrta a un aute tipe d’accions que, tot e non èster competéncia municipau, impliquen un projècte de país mès ampli e vagen dera man deth consens sociau e politic”.
07/09/2015