Notícies Veir istoric
Vielha Mijaran formalize era collaboracion damb Luchon e Benasque en programa europèu POCTEFA
Es tres municipis an signat aué eth convèni de collaboracion transfronterèra tara presentacion deth projècte POCTEFA qu’a coma objectiu qu’a coma objectiu potenciar es accions de besonh tà fomentar eth desvolopament sostenible des territòris participants
Aguest maitin s’a amiat a tèrme en Vielha era signatura formau deth convèni de collaboracion transfronterèra entre es municipis de Vielha Mijaran, Benasque e Luchon, a trauès des sòns alcaldes, que precedís era entrèga dera sollicitud tà desvolopar eth programa Poctefa (Programa de Cooperacion Territoriau España-França-Andorra).
Es accions qu’aguest projècte propòse se despartíssen en tres airaus: eth dera consolidacion dera cooperacion e era metuda en valor deth patrimòni culturau e naturau. En aguest sens se pretenen desvolopar accions encaminades ara potenciacion dera economia locau en tot crear productes toristics e de desvolopament sociau e culturau. Ua des accions destacades serà era connexion damb era rota 3404 qu’actuaument conècte as municipis de Benasque e Luchon ath torn der Aneto e que se harà a arribar enquiath municipi de Vielha Mijaran.
Segontes declaraue er alcalde de Vielha Mijaran, Juan Antonio Serrano: “Damb aguesta collaboracion, mès enlà deth pròpri POCTEFA, pretenem encetar ua linha de trabalh conjunta entre es tres vals que possibilite méter en marcha accions concrètes tath desvolopament des nòstes economies e dera qualitat de vida des nòsti vesins”
En acte tanben a prenut part era “Fundación Hospital de Benasque”, qui ajudarà a finançar ua accion puntuau entà qu’aguest municipi seguisque desvolopant un centre de documentacion d’aguestes tres vals.
*Ena fotografia, de quèrra a dreta: Jorge Mayoral, vicepresident dera “Fundación Hospital de Benasque”, José Ignacio Abadia, alcalde de Benasque, Juan Antonio Serrano, alcalde de Vielha Mijaran e Louis Ferré, alcalde Luchon.