Notícies Veir istoric
Er Estat obligue ar Ajuntament de Vielha Mijaran a dissòler era societat Vielha Gestion, SA que gestione eth Palai de Gèu
Aguesta societat, creada en 1994 tà gestionar eth Palai de Gèu de Vielha, ei participada majoritàriament per Ajuntament de Vielha Mijaran e actuaument se trape en ua grèu situacion de desequilibri financèr qu’obligue ath consistòri a dissoler-la per imperatiu legau
Era entrada en vigor, en gèr de 2014, dera Lei de racionalizacion e sostenibilitat dera Administracion locau (LRSAL) obligue as administracions publiques a dissòler aqueres entitats que li siguen deficitàries. Aguest ei eth cas dera societat Vielha Gestion, SA,societat participada en un 93,4471% per Ajuntament de Vielha Mijaran, que d’ençà dera sua creacion en 1994 a coma prètzhèt era explotacion deth Palai de Gèu. Pendent era legislatura anterior, eth passat mes d’abriu, er Ajuntament de Vielha Mijaran encomanèc a un gabinet d’expèrts un analizi dera situacion, que facilitèsse era prenuda de decisions der Ajuntament de Vielha Mijaran. Segontes smanifestaue Juan Antonio Serrano, alcalde de Vielha Mijaran: “entre es principaus conclusions d’aguest estudi destaque er hèt que Vielha Gestion, SA a deishat d’èster un esturment vàlid tà gestionar eth Palai de Gèu.” En aquest sens, Serrano afirmaue que “açò non vò díder que non poscam trapar ua naua formula’. Totun a rebrembat que “eth rèpte qu’auem dessús dera taula ei majoscol, pr’amor que laguens des possibles conseqüéncies i a eth barrament dera installacion, damb tot çò qu’aguest hèt pòt comportar. Ara mos cau somar es esfòrci de toti e hèt tot çò de possible tà qu’aguesta opcion non arribe”. Juan Antonio Serrano a assegurat que ‘era volentat der equip de Govèrn ei garantir era prestacion deth servici e evitar era interrupcion des activitats que se desvolopen en Palai de Gèu’. Tot e açò, Serrano a alertat tanben des dificultats de trobar ua alternativa qu’encaishe damb er ordenament juridic vigent. Tà iniciar damb era màxima celeritat es accions de besonh, er equip de Govèrn s’a amassat damb es grops damb representacion en Ajuntament tà informar-les dera situacion e damb es membres des conselhs d’aministravion de Vielha Gestion, SA des darrèri ans. En parallèl, tanben s’a organizat ua amassada damb mb eth personau laborau deras ocietat mercantila e ua session deth Conselh d’Administracion de Vielha Gestion, SA. Aguesta situacion, més enlà des legaus,tanben a importantess conseqüéncies economiques tar Ajuntament, pr’amor qu’eth deute dera societat actuaument se trape ath torn des 500.000€ e, ath delà, patís un deficit estructurau d’uns 350.000€ qu’er Ajuntament de Vielha Mijaran a assomit annaument. D’ençà dera sua creacion, Vielha Gestion, SA, a recebut der Ajuntament un impòrt acumulat d’aproximadament 5’5 milions d’euros Vielha e Mijaran, 4 de noveme de 2015
04/11/2015